Ka jingïalang bishar bniah halor ka prokram kaba la tip kum ka “Jan Bhagidaari – Sabse Door Sabse Pehle” la pynlong hynne ka sngi ha ophis jong ka District Rural Development Agency (DRDA), Ri-Bhoi District, ban bishar ïa ka jingïaid shaphrang jong ka campaign bad ki jingïoh jingmyntoi kiba la poi sha ki paidbah nongshong shnong jong ka district.
Ïa katei ka jingïalang la pynïaid da u Shri R. Brahma, MCS, Additional Deputy Commissioner bad Project Director ka SRES-DID, DRDA Ri-Bhoi District. Ka jingthmu jong kane ka jingïalang ka long ban peit bniah ïa ka jingtreikam jong kane ka prokram, ka jingïasnohkiti jong ki paidbah bad ruh ïa ki jingjop kiba la kot sha ki shnong jong ka district.
Katkum ka jingïathuh ha katei ka jingïalang, haduh 279 tylli ki shnong ha Ri-Bhoi District la lah ban iohjingmyntoi lyngba kane ka campaign da ka jingïatreilang jong ki tnat sorkar bapher bapher. Ka jingïatreilang hapdeng ki tnad sorkar ka la pynsuk ïa ka jingïoh jingïarap paidbah bad ban pynpoi ïa ki jingshakri sorkar wat sha ki jaka kiba jngai tam.
Lyngba kane ka campaign, la pynlong ruh ïa bun jait ki prokram jingïalap bad pynsngewthuh paidbah ban pynkhlaiñ ïa ka jingtip halor ki skhim sorkar bad ki jingshakri. Ki nongtrei Block ryngkat bad ki Rangbah Shnong lem bad ki paidbah shnong ki la pynlong ïa ki “Transect Walk” ban leit jurip ïa ki jingeh shnong bad jingïakren markhmat bad ki paidbah shnong.
Ka tnat ka koit ka khiah ruh ka la pynlong ïa ki Health Camp bad jingïalap paidbah paidbah lyngba ka door-to-door awareness campaign halor ka koit ka khiah, ka jingïada ka jingkhuid suba ki shnong bad ki skhim jingïarap paidbah jong ka sorkar. La ïohi ruh ïa ka jingïashim bynta shitrhem jong ki paidbah nong shong shnong kaba la pynlong ïa kane ka prokram kaba jop bad seisoh.
Ha ka jingïalang, ki ophisar na ki tnat sorkar bapher bapher ki la ïasam ïa ki jingshem jong ki, ki jingeh bad ki jingïakynduh bad ki jingujor naki paidbah bad ki jingeh kiba la mih na ki nongïoh jingmyntoi ha shnong halor ki skhim sorkar bad ki jingshakri paidbah.
La pyntip ruh ba bun na kine ki jingujor la lah ban pynbeit mardor lyngba ka jingïatreilang jong ki tnat sorkar ba dei peit, katba ïa kiba dang sah la shimti ban buddien bad leh ïa kaba donkam hadien habud.
Ka District Administration ka la ong ba kane ka campaign ka la pynkhlaiñ shuh shuh ïa ka jingïashim bynta ki paidbah halor ki skhim sorkar bad ka jingangnud jong ka sorkar ban pynthikna ba ki jingshakri paidbah kin poi wat sha ki bynta kiba jngai tam jong ka District.
Sa Peit Ruh
