Nongpoh, Naitung 08: Naduh ki Kali paidbah ba leit ba wan, ki paidbah nongshong shnong bad ki dukan ki la mad ia ka jingeh kaba khraw, ha kaba mynta ka sngi na ka daw ka jingjur u lapbah ka la pynshlei ha ki bynta jong ka surokbah ha Jorobat kaba pyniasoh sha Shillong bad Guwahati ha khappud ka Meghalaya bad Assam.
Kane ka jingshlei um ka la jia ha hadien ka jingther u lapbah naduh ka por shiteng sngi bad kumba ha ka por 4 baje ei ei ka umsaw ka la pynshlei ha katei ka surokbah ha Jorobat.
Kumba la sakhi bad iohi, bun ki Kali paidbah ba ieng lyngba kane ka surok ki la shem jingeh ban iaid na ka jingdap jong ka um ha katei ka surok bah bad la sakhi ruh lyngba ka durkhi ba kawei ka Kali Ignis ka la shah rong ha ka umsaw na ka daw ka jingshlei um kaba la ktah na ka jingjur slap.
Kumba la pynpaw ruh da ki nongshong shnong khamtam sha ka liang ka Assam, ki la ong ba kane ka jingshlei um ka la ktah jur bha ia ki, namar ka um saw ka la ioh ban rung shaduh ki dukan, ki ing ki sem bad bun ki jingdon jingem ki la duh bad sniew lut.
Kum ban pynkynmaw, kane ka jingshlei um ha Jorobat ka dei kaba la ju jia man la ka por tang la dawa wan u lapbah ba jur bad ka daw ka dei namar ka jingbym biang ki Nala um bad khamtam ruh ka jingbret pathar ia ki plastic bad ki jaboh sha ki nala um kaba la khang ban tuid ka um bad wan rah ka jingshlei um.
Sa peit ruh
