Ki kam lute ha surok bah National Highway 6 ha Ri Bhoi kim pat kut satia, wat hadien ba ki pulit ka Ri-Bhoi dang shen kila ioh ban kem 3 ngut ki nonglute naka jylla Assam kiba ju mlien ban lute naki trok ha surok bah National Highway haka thaiñ Umsning.
Sa kawei pat ka jingshah lute trok kala jia biang haka miet jong ka 26 tarik mynta u bnai haka por kumba 10:30 eiei mynmiet ha kaba kawei ka trok kaba don ïa u Number NL 01 AF 3277 bala ñiah da u Santu Rabha (29) kala shah khang lynti bad shah lute ha Shangbangla ha Ri-Bhoi haka kynhun ki runar ba don kumba 5 ngut kiba la wan da kawei ka kali Bolero (rong lieh) bym don number plate. Ki runar hadien ba khang lynti ïa katei ka trok kila rahbor ruh ïa u nongñiah katei ka trok da katei ka bolero ba khlem number.
Katkum ka tyllong khubor naki pulit, la ong ba u draibar katei ka trok u dang wan na UCW Central Bonded Warehouse 9 mer ban wan kit ïaka kyiad bad thmu ban leit buh sha Gaddes Bonded Warehouse sha Lad Rymbai hynrei mar sien poi ha Shangbangla ki runar ba don kumba 5 ngut kila pynsangeh jubor ïaka trok bad thep ruh ïa u nongñiah katei ka trok hapoh katei ka Bolero kaba kiew sha ki thaiñ Umsning bad kila shoh bad bom ruh ïa utei u nongñiah trok bad pynhap noh ha Umran Dairy hadien ba kila dep shoh pynmynsaw.
Shuh shuh ki runar ym tang ba ki rahbor ïa u nongñiah katei ka trok, hynrei kila lute lut ïa kyiad ba kit hapoh katei ka trok bad ïa katei ka trok thylli la pynieng ha ka thaiñ Umjarasi ha kaba ki pulit kila rah noh ïaka sha Nongpoh Police Station.
Ïa utei u nongñiah trok la pynkit noh mar mar sha Civil Hospital Nongpoh ban ioh ka jingsumar bad tang hadien ka jingpeit jingkhmih ki doctor la pynlait noh ïa u.
Naka liang ki pulit ka Ri-Bhoi kila pynlong ka jingthwet kaba jur ban lapdien ïa katei ka kali Bolero bad ki runar ba donkti ha katei ka kam, bad ka jingtohkit halor katei ka jingjia ka dang ïaid shakhmat ban lapdien ïa kitei ki runar ba donkti ha katei ka kam lute bad rahbor.
