Ka shnong Mawlongbna ha East Khasi Hills District ka la pynkut noh ïa ka lehniam Shad Suk Mynsiem kaba lai sngi lynter da ka jingiphuh iphieng bad jingïashim bynta shitrhem jong ki paidbah. Ïa kane ka lehniam tynrai la sdang naduh ka 15 tarik Jymmang bad pynkut ha ka 17 tarik hapdeng ka jingwan sakhi ki paidbah kiba wan peitkai na kylleng ki jaka.
Katkum ka jingïathuh jong ki nongshong shnong, ka Shad Suk Mynsiem ha Mawlongbna ka la sdang naduh u snem 1932 bad mynta ka la kynjoh kumba 94 snem eiei ka jingïai bteng pynneh pynsah ïa ka kolshor bad riti dustur u Khasi.
Ïa kane ka lehniam la pynlong da ka Seng Khasi Mawlongbna, ha kaba haduh kumba 700 ngut ki nongshad, kynthup ïa ki thei sotti bad ki rangkynsai, ki la shim bynta ha kane ka shad suk mynsiem ban pynlong ia kane ka sngi kaba phuh kaba phieng kum ka jingainguh ïa u Blei Nongbuh nongthaw ryngkat ka jingsawa jong ka ksing bad ka tangmuri.
Ha kane ka sngi la wan ban sakhi ruh da u MLA ka Mawsynram Constituency u Ollan Singh Suin, u President ka Seng Khasi Mawlongbna u Lurshai Tohtih, u Secretary u P. Nongsiej lem bad kiwei ki nongïalam shnong ryngkat ki paidbah ba bun balang.
SA PEIT RUH ||