Shibynta ban khring ïaki khynnah sha ki skul bad khamtam ban nang pynjanai ïaka rukom ai jinghikai naduh ba ki dang rit, kaba dei ruh shibynta jong ka National Education Policy 2020, ka Diwon Secondary School kala ioh ban plie paidbah ïa kawei ka kamra klas ba kyrpang jong ki heprit bala tip kum ka Foundational Literacy and Numeracy (FLN) Classroom.
Ka jingthmu jong ka skul ban wan rah ïa katei ka kamra klas kaba thymmai ka dei halor ka jingangnud ban nang pynbha ïaka pule puthi bad ban wan rah ïaka pule puthi kaba kham janai (Quality Education) katkum NEP 2020, kane ka skul ka la shna ia ka kamra klas kaba kham kyrpang na ka bynta ban iarap ia ki heprit kiba dang pule haki kyrdan Nursery kaba ngi tip kum ka Foundational Literacy & Numeracy Classroom katkum ka juk stad ba mynta.
Ïa katei ka FLN jong ka Diwon Govt. LP School, la wan ban plie paidbah da u Bah Mayral Born Syiem MLA ka Nongpoh kum u kongsan haka jingdonlang u Bah R Rizal SDSEO, Ri-Bhoi District, Bah K Tmung Chairman MC, Bah F Manih Headmaster, Bah B Tmung Rangbah Shnong, ki nonghikai, ki kmie ki kpa lem bad ki khynnah skul.
Naka liang u Bah Mayral Born Syiem ha katei ka sngi u la iarap ruh da ka pangkha kumba 10 tylli sha katei ka skul ban ioh ban pyndait ha manla ki kamra klas bad kumjuh ruh ka pisa khnang ba katei ka skul kan ioh ban pyndonkam ha kiba bun ki jingdonkam.
