Nongpoh, Jylliew 14: Naduh u MLA ka Umroi Constituency u Bah Damanbait Lamare, u chief engineer ka tnad PHE u Bah Robert Nongbri, u Additional Chief Engineer, u Bah Damian Umdor ryngkat kiwei ki ophisar mynta ka sngi k la leit ban hiar sha ki ar tylli ki Shnong kata ha ka Shnong Umroi Nongrah bad ha ka Shnong Umroi Jaïawpdeng ban jurip halor ki rukom pyntreikam ïa ki skhim umbam umdih, ba kitei ki shnong ki ïa kynduh jingeh na ka daw ka jingbym poi thikna ka umbam ka umdih sha ki shnong.
Ha kane ka jingleit jurip la pynlong ruh ïa ka jingïalang hadpeng ki nongïalam shnong bad kitei ki ophisar ha ryngkat ka jingdon lang u MLA, ha kaba ki la ïa tai bad ïa thir halor ki lad ki lynti ban weng ïa ka jingeh ki paidbah kiba mad ïa ka jingkyrduh umbam umdih ha katei kitei ki shnong.
Kumba la sakhi ha kane ka sngi, u Chief Engineer ka tnad PHE u Bah Robert Nongbri haba kren ha kane ka sngi u la pynpaw ba um hun satia ïa ka rukom treikam ki ophisar bad u la buh jingkylli ruh ba ha ka jingsngew jong u wat u SDO ruh um ju poi thikna ban wan jurip ïa kitei ki skhim umbam umdih.
U la pynpaw ruh ïa ka jingbym hun ïa ka rukom treikam bad kyntu ruh da kaba ong ban pynbit pynbiang ïa ka umbam umdih, kam dei tang ka kamram u Contractor ban pyntreikam ïa ka kam, hynrei ki nongïalam shnong bad wat ki ophisar ruh ki don ka hok ban tuklar lada ki lap ba ka jingpyntreikam ïa ka kam kam long kaba biang kumba donkam u paidbah.
Ha kane ka sngi, naduh u MLA, u Bah Damanbait Lamare, u la ai khublei ïa ki heh ophisar ka tnad PHE kiba la shim khia ban wan jurip lang ha kane ka sngi bad ka daw ka long ban pynbit pynbiang ïa ka jingsam umbam umdih sha kitei ki shnong bad khmih lynti ruh ba kane ka jingwan poi ki heh ophisar ka tnat PHE kan pynthikna ba kitei ki 2 tylli ki shnong kin ioh noh ïa ka umbam umdih kaba thikna, khnang ba kan nym wan rah jingeh shuh ïa ki paidbah nongshong shnong ha kaba ïa dei bad ka umbam ka umdih.
