Nongpoh, Jylliew 19: Tang naka jingkynnoh trei torti u trai kawei ka petrol pump kaba dang shna thymmai harud surok bah National Highway ha Mawdiangum, ki bynta jong ka service road hakhmat Jadhi mynta ka sngi kala shlei da um haduh ba ka um kala ioh ban rung sha iing briew.
Haba ioh ban iakren bad uwei naki Rangbah u ba don ruh u para ba shong ba sah ha kawei ka iing ha katei ka jaka u la ong ba kane ka dei tang naka jingtrei torti utei u trai petrol pump ba ka um kam ioh shuh ban tuid bad pynthud iaka leit ka wan ki paidbah haduh ba ka um kala rung ruh shaduh iing watla kam dei ka jingjulor hynrei ki khaw, ki jhur ki jhep bad ki tiar kila sniew naka jingtuid ka umsaw.
U la kyrpad ruh ia ki bor ba dei peit ba kin shimkhia namar lada ka um kam ioh ban tuid katei ka jaka kan shlei um beit man ba hap slap.
Ka jingshlei um ka la ktah ruh ha ki bynta jong ka service road ha Pahamshyiem hajan ka skul Apha, kaba dei hadien ka jingjur u lapbah bad ka daw ka jingshlei um ka dei ka jingbym biang ki Nala um bad ruh ka jingbret pathar ki paidbah ia ki plastic ha ki nala um.
Kane ka jingshlei um ka la pynsyrtok ruh ym tang ia ki paidbah bad wat ia ki khynnah skul.
Sa peit ruh
