Ki paidbah naduh ki nongïalam shnong, ki nonghikai jong ki shnong bapher bapher ka thaiñ khappud Block II ha Ri Bhoi District kila pynpaw ka jingkynduh mawsiang ha ka ba iadei bad ka pule ka puthi namar kumba long haduh mynta kitei ki shnong khappud kim don iaki skul bad ki jaka pule ba biang hynrei kila don tang katto katne tylli ki skul kiba la shu kyrshan da ki shnong bad wat iaka tulop la shu lum naki iing briew ka ba la buh jingeh ïaki nonghikai ban pyndep iala ka kamram namar don ki khep ba kim ioh wat ka tulop namar ka jingduk jingkyrduh ki paidbah nongshong shnong, namar kam don kano kano ka jingïarap naka sorkar.
Ia katei ka jingialang ban sngew ban sngap iaka jingeh ki paidbah la lum da u MLA ka Mawhati u Bah Charles Marngar haka shnong Umlaper ban tip iaka jingeh bad ka jynjar ka thaiñ ha ka ba iadei bad ka pule puthi bad kumno ban kyntiew iaki skul, ka tulop ki nonghikai bad kiwei kiwei.
Naka liang ki nonghikai bad nongïalam shnong ha katei ka thaiñ naduh ka shnong Umlaper, Ummat, Ummat-2, Pdengtleit, Umsder, Umhi bad kiwei kiwei kila pynpaw ba katei ka thaiñ haduh mynta kam don ki skul ba biang, lait noh tang ki skul shnong, ki skul mission bala shu kyrshan da ki paidbah kiba kut tang haki klas rit, bad ka long shisha ka jingeh kaba khraw iaki nonghikai ban pyntyllun iaka kam namar nalor ka jingsiew kaba rit ba ki ioh, ka tulop ruh kam long kaba thikna bad teng teng ka sahkut haduh shisnem ruh.
Hadien ka jingsngew bad sngap iaki jingeh jong ki paidbah naka liang u Bah Charles Marngar u la kular ban iarap kyrshan iaka tulop ki nonghikai sha kitei ki skul kiba shem jingeh bad shimkhia ruh ban iakren bad ka sorkar ban wanrah ki jaka pule bad ki skul building kiba biang naka bynta ka jingbit jingbiang jong ki paidbah bad ha katei ka sngi la thaw ruh kawei ka committee bala tip kum ka Education committee Border Area Raid Nongtung naka bynta ka bit ka biang ki skul ha katei ka thaiñ.
