Nongpoh, Jylliew 22: Ka Federation of Khasi Jaintia and Garo People (FKJGP), Baridua Them Marwet Circle hapoh ka jingïalam u President Bah Denis Nongrum bad u Secretary Bah Allan Donald Sohpdang ryngkat bad ki dkhot ka seng, mynta ka sngi ki la ïakynduh ïa u Bah U. Kurbah, Executive Engineer ka tnad PHE, Nongpoh Division, ban ïakren ha kaba ïadei bad jingtreikam jong ka skhim Jal Jeevan Mission (JJM) haki thaiñ Baridua.
Haba kren sha ki lad pathai khubor hadien ka jingïakynduh, u Secretary ka FKJGP, Bah Allan Donald Sohpdang, u la ong ba ka seng ka la pynpaw ïa ka jingsngewkhia namar kiba bun ki projek JJM kiba dang sahkut bad ym pat lah ban pyndep naduh u snem 2023, khamtam eh haba ïadei bad ka jingpynpoi ïaki pipe um sha ki thliew iing briew.
Sa pule ruh: Ïakynduh Ki Nongrep Bad Ki Heh SBI Ban Kyntiew Ïa Ka Rukom Rep Thymmai
U la ong ruh ba kiba bun ki nongshong shnong ki la pynpaw ïa ka jingbymhun namar haduh mynta kim pat ïoh ïa ka umbam umdih lyngba kane ka skhim, watla la dep pyntrei ïa ki projek ha ki katto katne ki bynta. Kane ka la wanrah jingeh ïa ki paidbah bad ka la pynslem ruh ïa ka jingmyntoi kaba ki paidbah ki dei ban ioh lyngba kane ka skhim.
Namarkata, ka FKJGP ka la kyntu ïa ka tnad PHE ba kan pynsted ïa ki kam kiba dang sah khnang ba ki paidbah kiba dei hok ban ïoh jingmyntoi na ka Jal Jeevan Mission kin ïoh noh ïa ka umbam umdih kaba pura bad kaba neh.
Katkum ka jingïathuh u Bah Sohpdang, naka liang u EE ka tnad PHE u la kubur ba dang don shibun ki bynta jong ka projek kiba dang sahkut. U la pynthikna ruh ba ka tnad kan leh ïa kaba donkam ban pynsted ïa ka jingpyndep ïa ki bad kum ka seng kala kyrpad ïaka tnad PHE ba kan shimkhia bad naka liang ka seng kan dang iai buddien ïa kane ka kam khnang ba katei ka skhim kan long ka jingmyntoi ïaki paidbah.
Sa peit ruh
