Da ki hajar ngut ki paidbah mynta ka sngi kila tuid sha Mawlyndep ban sakhi ïaka sngi pynkut noh ïaka lympung ñiah kali haki jaka ba khohruh khohram, ka 7th AHOR 4X4 Off Road Challenge 2025 bala pynlong da ka Adventurous Hynñiewtrep Off Roaders (AHOR) kaba la khring ïaki paidbah namar ka jingwan shim bynta jong ki nongñiah kali ba tbit na kylleng ka ri Khasi bad Jaiñtia bad wat nabar jylla kiba la kyrñion ktieh haki surok kiba ima kiba ktieh bad khohruh khohram.
Ïa katei ka lympung la sdang naduh ka 23 tarik mynta u bnai bad la pynkut pat mynta ka 25 tarik Risaw bala pynïakhun haki 3 tylli ki kyrdan kata ka Stock Category, Semi-Modified Category bad Pro Modified Category.
Ïa katei ka lympung la wan ban pyndap pyrda da u Bah Paul Lyngdoh MLA ka West Shillong ba dei ruh u nongaibuit ka tnad Social Welfare kum u kongsan, haka jingdonlang u Bah Damian Umdor President ka AHOR, Bah Fedinand Jahrin Secretary, Bah Ferdinald Kharkamni Vice President bad kiwei kiwei.
Haba kren ha kane ka sngi naka liang u Bah Paul Lyngdoh u la ong ba kane ka jinglehkai ka dei kawei naki jait jinglehkai kaba long kum ka rynsan ban sei madan ïaka sap ñiah kali ki khun samla naka jylla kaba khring ruh ïaki nongjngohkai pyrthei na kylleng ki jaka bad kaba lah ruh ban kyntiew ïaka ioh ka kot ki paidbah nongshong shnong ka thaiñ Mawlyndep.
U la ong ruh ba naka liang ka tnad jngohkai pyrthei kala kyrshan ïa kane ka kynhun mynta u snem da ka song pisa bad kaba kham sngewtynnad ka long ba kane ka jait jinglehkai kala rung ruh haka map jngohkai pyrthei kaba long kawei naki jinglehkai kaba lah ban khring ïaki briew nabar jylla, bad lyngba ka jingtreilang ngin dang lah shuh shuh ban kyntiew na uwei u snem sha u wei pat namar bun naki jaka sah, ki iing basa ki dap da ka jingdon katei ka lympung bad kane kan long ka lad kamai ruh ïaki nongshong shnong ha kane ka thaiñ, bad nangne shakhmat ai ba ki paidbah kin nang kiew nang san haka ioh ka kot, la bynrap u Bah Paul.
Ki nongjop ha katei ka lympung ki long haka liang ki nongshim bynta ba rangbah tam la rah da u Bah Eugene Niangti, Best Driver haka Stock Category la rah da u Bah Bawan Passah, Best Co-Driver pat la rah da u Bah Bari Umdor, haka kyrdan Semi Modified Caterory la rah da u Lickstar Marbaniang bad Best Co-Driver la rah da u Bathiangkupar Dkhar, katba haka Pro-Modified Category la rah da u Bah Eugene Niangti, Best Co-Driver Bah Arland Kharumnuid kynthup kiwei kiwei ki khusnam.
Ïaka nam lahduh haka Stock Category la rah da u Bah Barry Umdor bad Dawan Passah, haka Semi Modified Category ïaka nam lahduh la rah da u Lickstar Marbaniang bad u Andrew Khongjee, haka Pro Modified Category la rah da u Highfield Syiem bad Patsha Kharkongor katba haka liang ki kynthei la rah da ka Banpynsulang RL Mawlong haka kyrdan ba nyngkong bad ka Febronica E Pajat haka kyrdan ba ar.