Nongpoh, Rymphang 28: Kum shibynta ban pynkhlaiñ ïa ka jingsumar paidbah haduh ki shnong kiba jngai bad ban pynsaphriang ïa ka khubor halor ka koit ka khiah, Naka liang ka Glenmark Foundation, ha ka jingïatreilang bad ka Society for Action in Community Health (SACH) ka la pynlait paidbah ïa ka kali ai jingsumar kaba la tip kum ka “Health on Wheels”, ka Mobile Medical Unit ka ban leit ai jingshakri sha ki shnong kyndong.

Kane ka projek ka thmu ban pynkhlaiñ ïa ka rukom treikam jong ka koit ka khiah ha ki shnong bad ban pynthikna ba ki paidbah ki ïoh ïa ka jingsumar kaba paka.

Kane ka sienjam ka thmu ban pynpoi ïa ki  jingsumar ha kumba 20 tylli ki shnong ha Ri Bhoi District. Ka Mobile Medical Unit kan ai jingshakri  paidbah ha khyrdop jong ki shnong, khamtam ïa ki kynthei armet, ki khynnah, ki riew Rangbah bad kiwei pat kiba don ha ki jingeh ban ïoh jingïarap ha ka por kaba biang bad Kane ka prokram ka long shi bynta na ka jingthmu ban pynjanai ïa ka jingshakri paidbah ha ki thaiñ nongkyndong bad ban pynthikna ba ka jingsumar ka poi sha kiba donkam tam.

Ïa katei ka kali Health On Wheels la pynlait paidbah mynta ka sngi ha Umsning da u Dr. Celestine Lyngdoh, MLA ka Umsning Constituency, kum u kongsan. Ha kane ka jingïalang la ïadonlang ruh u Sampath Kumar, Principal Secretary ka Sorkar Jylla, ka Sweta Monjal, Chief Communication bad CSR Officer ka Glenmark Pharmaceuticals, u KP Rajandran na ka liang ka SACH, lem bad kiwei pat ki nongtrei jong ka tnat ka koit ka khiah.

Haba kren ha ka jingïalang, u Dr. Celestine Lyngdoh u la ai jingïaroh ïa kane ka sienjam bad u la ban jur halor ka jingdonkam ban pynkhlaiñ ïa ka jingsumar ha ki thaiñ nongkyndong. U la pynpaw ïaka jingsngewnguh ïaka Glenmark Foundation bad ka SACH ba ki la shim ia kane ka sienjam da kaba ong ruh ba kane ka Mobile Medical Unit kan wanrah ïaki Jingmyntoi shibun ïa ki paidbah.