Nongpoh, Naiwieng 09: U Lat ka jylla u C.H Vijayashankar, u da nguh da dem khrup hakhmat u Mawbynna ba pynieng da ka Seng Khasi Kmie, Mawkhar Shillong, hajan ka duwan ka dupat ka jong u Lum Sohpetbneng, ha ka sngi kaba u la leit ban iashim bynta ha ka jingpynieng ia kumba 40 tylli tam ki mawbynna sah nam sah kyrteng jong ki Jylli bad ki Tnat Seng Khasi bad Seiñ Raij, kaba la long mynta ka sngi halor une u lum ba kyntang.
Nalor u Lat, kiba la poi ban sakhi lang ia kane ka sngi ki kynthup naduh u Symbud Myntri Rangbah ka jylla ba dei khmih ia ka tnat Home (Police) u bah Prestone Tynsong, u myntri ba dei khmih ia ka tnat Arts & Culture u bah Sanbor Shullai.
Kumban shu pynkynmaw ba mynta ka sngi, kane ka jingpynieng ia kine ki 40 tylli tam ki mawbynna, ka dei artad kum shi bynta ba kum ka seng ka rakhe ia ka lyngkhuh snem kaba 125 ka jingseng ia ka Seng Khasi.
Sa kiwei kiwei pat ki riew pawkhmat ki kiba la wan ban ia sakhi lang ia kane ka sngi ban pynahnam tam ia ka jaidbynriew ki long u Syiem ka Hima Mylliem u Pa’iem Ainam Manik Syiem, u Dalloi ka Jowai Puramon Kynjing, Doloi Nangbah Moon Garod, ha kaba la don lang u President, General Secretary ka Seng Khasi Kmie, Rgh O. Pyngrope, Rgh Hainess Marbaniang, ki dkhot ka Jylli Pyrkhat Kam (JPK) Seng Khasi, ki nongialam ba hakhmat ki jylli bad ki tnat.
Ka jingpynieng ia kine ki mawbynna sah nam ha kliar bad ki sawdong sawkun jong une u lum ba kyntang, kan pynkylla shi syndon ia ka dur ka dar jong u, ha kaba mynta nangne shakhmat kan da don ka ‘Kper Mawbynna’, ka dak jong kata ka jinglong ba ia tylli kum ka jaitbynriew, kaba dang don dang sah haduh mynta ia la ka jong ka niam hok tynrai ka jong ka.
Haba kren ha ka jingialang, u Lat um lah ban khlem da pyrto bad ainam ai burom ia ka Seng Khasi, kiba la trei shitom bad ban aiti met bad mynsiem naka bynta ban pynneh ban pynsah ia ka riti ka dustur, ia ka snap ka jingstad u longshwa u manshwa, kaba iai bteng ba kan hiar pateng la pateng tad haduh kine ki sngi kiba mynta.
Hadien jong kane ka sngi, ka seng ka dang don ki kam ba kan hap ba kan pyndep, kum ka jingpynlong ia ka Dorbar Pyllun bad ka Dorbar Kut Snem, kaba la buh ba kan long ha ka 15 bad ka 16 tarik mynta u bnai bad ba kan pynkut ia kane ka jingrakhe da ka jingpynlong pat ia ka Seng Kut Snem kaba 126 ka jong ka, kaban klong ha ka 23 tarik mynta hi u bnai.
Ha kane ka sngi, ka Seng Khasi kmie ka la aiti ruh ia ka dorkhas sha u Lat ka jylla na ka bynta ki jingdonkam kiba dang duna ha katei ka jaka kyntang jong u Lum Sohpetbneng ba kynthup ban pynbna noh kum ka Law Nongthroh ha Lum Sohpetbneng ba kan long ka jaka sah nam ha ka jylla, ki jingdonkam ban ker ia utei u lum kyntang, ban ioh ka surok bap aka na Lumsohpetbneng sha duh ka shnong Umeit, ban dang pynbiang ia kiwei kiwei ki jingtei kiba dang donkam ha utei u Lum Sohpetbneng kumta uta u Lum kyntang.