Khliehriat, May 14: Ka Joint Action Committee jong ki ar tylli ki seng ba kynthup ïa ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) hynnin ka sngi ki la weng noh ïa ka jingïakhih pyrshah ïa ka Dalmia Cement ha East Jaintia Hills, kaba dei hadien ba ki bor pynïaid katei ka Dalmia Cement ki la kular ban pynurlong ïa ka jingdawa jong ka Joint Action Committee.
Kum ban pynkynmaw, kitei ki ar tylli ki seng ha ka lama ka Joint Action Committee ki la sdang ïa ka jingïakhih pyrshah ïa ka Dalmia Cement bad ïa ki Bulker Truck ba kit ïa ki cement powder naduh ka 14 tarik u Ïaiong 2026 ha kaba la jan dap shi bnai ka jingïakhih, hynrei ka Dalmia Cement ka la kular ban pynurlong ïa ka jingdawa ba ki la weng noh ïa ka jingïakhih bad na ka bynta ki Bulker Truck kiba kit ïa ki cement powder pat ka JAC ka dang ïaid pyrshah jur.
Haba kren sha ki lad pathai khubor, u Bah Biangshwa Shylla Chairman ka JAC bad u Bah Kyrshan Dkhar Secretary ka JAC, ki la ong ba ïa mynta ki la weng noh ïa ka jingïakhih pyrshah ïa ka Dalmia Cement ba hadien ka jingïakynduh ha Guwhati ki la rai ba sngap ïa ka jingdawa ka JAC da kaba kin ai 7 kali shi sngi na ka bynta kitei ki 2 tylli ki Association, kata ka long 14 kali shi sngi ban kit cement bad nalor kata ki la pynkiew ruh ïa ka bai kali sha ka Rs. 975 shi ton ban pynhap ïa u Cement sha Barak Valley.
KI la ong ruh ha kaba ïa dei bad ki Bulker Truck, u Deputy Commissioner ka East Jaintia hills u la khot da ka jingïalang hynnin ka sngi ba la shim bynta naduh ki nongïalam ka JAC, ki nongmihkhmat na ka Bulker Truck, u SP ka East Jiantia hills, ki Cement Factory bad ki bor synshar District, hynrei kane ka jingïakynduh kam shym la seisoh bad u DC u la phah ïa pynbeit shuwa bad ki Bulker Truck ba kin sa ai ïa ka kaiphod sha u DC.
Shuh shuh, ki la bynrap ruh da kaba ong, ba haduh mynta ki dang pyrshah ïa ki Bulker Truck ba wan kit cement powder kiba don mynta kumba 70 haduh 80 tylli bad ioh kan poi ka por ba kin wan da ki hajar tylli ruh ba na ka liang ka JAC ka dang pyrshah jur, namar ka jingwan kit cement kine ki Bulker truck ka ktah ïa ki trai district kiba don ïa ki Trok kit cement.