Shillong, Ïaiong 15: U Myntri Rangbah ka Jylla u Conrad K Sangma u la pynbna ba naduh u bnai Jymmang, ka Sorkar kan sdang ïaka jingwad bniah (Research Program) ïaka thymmei, ka tynrai sdang jong ka jaidbynriew Khasi-Jaintia bad Garo.

Ka Sorkar ka la thaw 2 tylli ki Committee kata kawei ka committee ban tih tynrai ïaka jaidbynriew Khasi-Jaintia bad kawei ka Committee na ka bynta ka jaidbynriew Garo bad kine ki Committee kin wad bniah ïaka thmmmei, tynrai jong ki jaidbynriew riewlum jong ka Jylla Meghalaya.

“Kawei na ki jingbishar ba donkam tam ka long ka jingkhmih bniah halor ki ar tylli ki komiti kiba peit ïa ka thymmei (roots) jong ki jaitbynriew Khasi-Jaintia bad ka jaitbynriew Garo bad kane kan kynthup ïa ka ‘DNA mapping’, ka jingwad bniah ïa ka thylliej (linguistics), bad ka riti riti dustur” la ong u Conrad.

U Conrad ula ong ba ka kamram jong ki Committee kadei ban lum ïa ki jingshisha bad ki sakhi kiba khlem pat shym la thoh ne buh jingkynshew (documentation) bha mynshwa.

Nalor kane u Myntri Rangbah ka jylla, u Conrad K Sangma u la khot pynlong ïa ki kynhun jingïalang ban bishar kam halor ki kam pynroi, ka khuid ka suba, bad ki projek pynitynnad ïa ki nongbah Shillong, Jowai bad Tura.

Ka jinglum jingïalang bishar kam kadei namar bakq Sorkar ka thmu ban kyntiew shuh shuh ïa ka jingkhuid ka nongbah da kaba kynthup lang ïa ki kynhun shnong khamtam haba ïadei bad ka rukom lum bad pynkhuid ïa ki niut (waste management) bad ka jingpynbiang ïa ki rud um kiba khlem pat biang rukom ha ki katto katne ki jaka.