Nongpoh, Naitung 28: U samla Benison Shadap na ka shnong Niangbarilum lem bad u heprit Kynshan-i- Suchiang na Pahammawlein 20mer, ki la ioh ban khur ia ka Takma Ksiar ha ka rynsan iakura kaba la tip kum ka 1st National Kun Khmer Championship ba dang shu dep ha Goa.
Ia katei ka 1st National Kun Khmer Championship kaba la long ha Goa, ka dei kaba la sdang ha ka 25 tarik bad kut hynnin ka 27 tarik u Naitung, ha kaba ia katei ka lympung ialehkai, la leit ban plie pyrda da u Shripad Y. Naik, Myntri sorkar pdeng ha ryngkat ka jingdon kiwei ki heh jong ka Association of Kun Khmer Federation lem bad kiwei.
Kitei ki arngut, kiba la khur Takma Ksiar ha katei ka 1st National Kun Khmer Championship, ki la poi sha ka jylla mynta ka sngi bad kiba la shah pdiang burom ha shnong Pahammawlein 20mer, ha ka jingdon ki nongialam ka RBYF 20mer Circle lem bad ki riew rangbah jong katei ka thain.
Ha katei ka sngi ba la pdiang burom ia kitei ki arngut, na ka liang ka RBYF 20mer Circle kaba la ialam da u President u Bah Peter Syngkli, ha ryngkat ka jingdon u samla Seiborlang Rani, General Secretary lem bad shibun ki dkhot ka seng.
Lyngba jong katei ka sngi, ba la pdiang burom ia kitei ki arngut, ka RBYF ka la ai da ki jingai sngewbha, kaba long kum kata ka dak ba la pdiang burom ia ki, namar ka jinglah jong ki ban khur Takma Ksiar ha katei ka lympung, kaba la long ka burom ym tang ia ka thain, hynrei ia ka Distrik bad jylla hi baroh kawei.
