New Delhi, Naitung 10: Ka sorkar jylla Meghalaya ryngkat bad ki nongrep kala pynpoi kumba 25 metric ton u sohtrun sha Nongbah Delhi ban pynïaid iew haka tamasa sohtun kaba 3 sngi kaba la sdang mynta ka sngi ha Dilli Haat kaba don ha Nongbah Delhi, bad kumba la sakhi ba ka jingdawa ïa u soh ka long kaba shyrkhei namar ki paidbah kila ap lypa naduh shuwa ban sdang ka tamasa.
Haba pyntip ïa kane u Vijay Kumar Mantri Commissioner and Secretary ka sorkar Meghalaya u la ong ba nalor ba ka jylla ka don ïaka jaka bad ka mariang kaba itynnad, ka pynmih ruh shibun ki mar rep bad u sohtrun udei naki naki jait soh u ba thiang tam bala pynmih naka jylla bad ka jingrah ïa u soh sha Nongbah Delhi kala long kaba seisoh bad wat ka jingshalan shabar ri kum ki ri middle east.
U la ong ba kane ka tamasa kala ïaid lynti kumba 4 snem bad kane ka dei ka sien kaba saw bala pynlong kum kane ka tamasa ha nongbah Delhi bad katba nang mih u snem kane ka tamasa kala nang heh nang heh haba nujor bad ki slem bala leit da ka jingshim bynta shitrhem jong ki nongrep ka jylla bad ka jingjop jong kane ka tamasa ka dei namar ka jingiohi jngai jong u Myntri rangbah ka jylla u ba don ka thong ban kyntiew ym tang ïaki nongrep sohtrun hynrei wat kiwei kiwei ki mar rep kum u shynrai, u sying, u sohmrit bad kiwei de.
Lyngba kum kine ki tamasa ka long ruh ka rynsan ïaki mar rep naka jylla sha ka pyrthei bad ka ioh ka kot ki nongrep kala kiew ar shah namar ka dor kala ïapher shibun haba ki die haka jylla bad shabar ka jylla bad wat shabar ri kumta kane ka long ka jingjop kaba khraw ïaki nongrep bad ka sorkar kala nang wad lad shuh shuh kumno ban nang pynjanai bad ban nang kyntiew shuh shuh ïaki nongrep ka jylla.
Sa peit ruh
