Shillong, Naitung 10: U Myntri sorkar ka jylla u Bah Sanbor Shullai mynta ka sngi u la pynpaw ba u dap da ka mynsiem jong ka jingsngew lyngngoh ba ka Party VPP ka pyrshah ne ka wad daw ia u Myntri Rangbah ka jylla Assam u Himanta Biswa Sarma ha ka jingwan shim bynta jong u kum u kongsan ha ka lehniam Behdienkhlam ha Jowai.
Haba kren sha ki lad pathai khubor, u Bah Sanbor Shullai u la ong ba kane ka jingwad daw ka paty VPP ia u Himanta Biswa Sarmar ka long thamula pynban bad kaba ym sngew iahap satia, namar ka jingwan shim bynta jong u ha katei ka lehniam Behdienkhlam kum u kongsan ka dei ka jingkhot sngewbha ka Sein Raij Jowai.
U la ong ruh ba ka jingwan shim bynta jong u ha katei ka lehniam Behdienkhlam kam don jingiadei satia bad ki kam pynbiet pud pynbeit sam, namar ia kane ka kam pynbeit pud ka dei ka kamram jong ka sorkar Assam bad Meghalaya bad la dep ruh ban thung da ka Committee halor ki kam pynbiet pud.
“Ban ong ban pyrshah ne wad daw ia ka jingwan shim bynta ha kane ka lehniam Behdienkhlam ka long kaba ym sngewiahap satia, namar ha kano kano ka jinglehniam lah ban wan mano mano haba ki kwah ban wan” ong u Bah Sanbor Shullai, bad bynrap ruh naduh ki riew shimet, ki seng bhalang ne ki political party ki don ia ka hok ban kren ne pynpaw ia kino kino ki mat ki jura kiba ktah ia ki paidbah, hynrei ban pyrshah haba wan shim bynta ha katei ka lehniam behdienkhlam ka long kaba sngewthamula” u la bynrap.
Sa peit ruh
