Shillong, Rymphang 05: Na ka jingpynbthei ia ka par dewiong ha ka thain Thangsko ha East Jaintia Hills mynta ka step la suba ba bun ngut ki nongtih dewiong ki la duh ia ka jingim bad ia kane haduh mynta ym pat lah satia ban pynthikna ha kaba ki bor pulit ka East Jaintia Hills ki dang leit ban tohkit halor kane ka jingjia.

Kumba la saphriang ka dur khih ha ka rynsan social media, la iohi ba ka la don ka jingbthei kaba shyrkhei hapoh ka par dewiong bad la suba ruh lah ban don bun ngut kiba la duh ia la ka jingim.

Ha katei ka dur khih ba la saphriang ka ladon ruh ka jingiam briew bad ka jingklumar  hadien ba la bthei katei ka par dewiong ba la suba ba ka dei ka jingpynbthei na ka jingtih ia u dewiong.

La ong ruh halor kane ka jingpynbthei bom na ka jingtih dewiong ym pat lah ban tip la ka dei ka par dewiong ka dei kaba la ioh bor na ka sorkar ne ka dei kaba shu tih beain bad na ka liang ki pulit ki la hiar sha katei ka jaka ban pynlong ia ka jingtohkit kaba bniah halor kane ka jingjia ba la suba ba bun ngut ki nongtih dewiong ki la duh ia la ka jingim wat la ym pat lah ban ai ia ka  jingpynthikna kaba pura.