Shillong, Nailur 01: Ki nongialam bad dkhot ka Meghalaya Bharatiya Janata Party (BJP) hynne ka sngi kila leit tur sha Ophis treikam ka Meghalaya Pradesh Congress Committee (MPCC) ban pynrem iaki Nongialam ka Indian National Congress (INC) ha ryngkat ka jingkynnoh ba kila kren bein iaka kmie u Myntri Rangbahduh ka Ri India u Narendra Modi.
La sakhi baki Nongialam ka BJP ha ryngkat ki Pla Card kila wan hylla bad pyrta ban pynrem iaka Seng Congress.
Naka liang ki Nongialam ka Congress ruh kiba don ha phyllaw jong ka Ophis ruh kila hylla bad pynrem ia ka BJP bad ia u Myntri Rangbahduh ka Ri India u Narendra Modi.
Haka jingia hylla bad pyrta, ki dkhot ka MPCC, kila pyrta ‘Modi Vote Chor’ lane u Narendra Modi u nongtuh Vote’.
Ki dkhot ka BJP, kila pyrta ba haka sengsain pyrthei phi lah ban don ka jingiashun hynrei phim lah pat ban kren bein iaka briew kaba ym don shuh haka pyrthei.
Haba iadei bad kane ka Meghalaya BJP kala ujor daka ejahar pyrshah iaka MP ka West Bengal ka Mahua Moitra daka ba kynnoh baka byrngem ban khrai khlieh ia u Myntri ka tnat kampohiing ka Sorkar Pdeng u Amit Shah.
Haba kren shaki lad pathai khubor ka State President Mahila Morcha Meghalaya ka Kong Erina Hynniewta kala ong ba ka jingiakhih ha khmat office Congress kadei ban pynrem iaka jingkren bein ki dkhot bad kumjuh ruh ka nongialam jong ka TMC kaba don lang ha INDIA Block.
Kala ong ba naka liang ka Meghalaya BJP kala ujor daka Zero FIR ban dawa naki Pulit ka Meghalaya ban leh iaka ba donkam ban kem iaki ba kren bein iaka kmie u Myntri Rangbahduh ka Ri India u Narendra Modi bad ia u Amit Shah.
