Tyngshain ki thei Khasi ba mihkhmat ia ri bad pynlong ia ka India kum ka lahduh ha ka SAFF U-17 Women’s Champions

National, August 31: Arngut ki thei ialehkai phutbol na ka jylla, kiba kynthup ia ka samla Alisha Lyngdoh bad ka samla Bonifilia Shullai, kiba la ioh ban mihkhmat ia ka India ha ka lympung ialehkai ka SAFF U-17 Women’s Championships, ki la lah ban ialehkai bha eh ha katei ka lympung bad kaba la pynlong syndon ia ka India ba kan long kum ka lahduh ha katei ka lympung ialehkai jong ki ri kiba hap ha ka South Asian Football Federation.
Katei ka lympung ialehkai SAFF U-17 Women’s Championships 2025, ka dei kaba la pynlong hapoh ka ri Bhutan, ia kaba la iashimbynta da ki ri kiba kynthup ia ka Bangladesh, Nepal, Bhutan.
Ka rukom ialehkai ha katei ka lympung, ka long ba kawei ka ri ia kawei pat, ki hap iakhun arsien bad ka kynhun kaba don hakhlieh duh ha ka jingioh poin, ba kan long long kum ka lahduh.
Ha ka kynhun ialehkai ka India, la don arngut ki thei samla Khasi, kita kiba kynthup ia ka samla Alisha Lyngdoh lem bad ka samla Bonifilia Shullai, ha kaba lyngba katei ka lympung, la iohi ba ki la pyni shisha ia kata ka sap ialehkai ba kyrpang, kiba la tyngshain bad long kum kum ki khlur ia ka jylla kiba la mihkhmat ia ka ri.
Haba phai ha ka jingiakhun ka India ha katei ka lympung, ka la long ba ka la shu jop lynter beit khlem shah rem, ia kaba kum ka namjop la dep pynbna naduh shwa ka jingiakhun ba khatduh pyrshah ia ka Bangladesh, ha kaba ka India ka la shah rem noh da 4-3.