Shillong, Naitung 16: Ka Chairperson ka Meghalaya State Commission for Protection of Child Rights (MSCPCR) ka Agatha K Sangma hynne ka sngi kala kyntu ia ka Sorkar Jylla ban shna bun ki park na ka bynta ki khynnah bad ka jingdonkam ia ka Standard Operating Procedure (SOP) ban pynthikna ia ka jingshngain bad ka bha ka miat ki Khynnah, kiba leit sha kiwei pat ki Jylla jong ka Ri.
Ïa kane ka jingkyntu, ka Agatha kala pynsngew haka jingïalang bad u Myntri ka tnat Social Welfare u Bah Paul Lyngdoh.
Haba kren shaki lad pathai khubor, ka Agatha kala ong ba ka jingdon ki SOP kan pynthikna ba ki Seng/kynhun bad riew shimet kin hap ban bud ia ki kyndon bala buh haba ialam ia ki Khynnah ban pule shabar ka Jylla.
“Nga la iakynduh ia u Myntri Rangbah bad Myntri ka Tnad Social Welfare hynne ka sngi ban kyrpad ban shna kham bun ki madan phlang, ki park ha ka sor jong ngi” la ong ka Agatha.
Ka Agatha kala pynsngew ha u Myntri ka tnad Social Welfare halor ka rai ba donkam ban thaw noh ia ka SOP na ka bynta ka jingshngain jong ki khynnah kiba leit shabar ka Jylla lane ba shah ialam shabar ka Jylla da ki riew shimet lane ki kynja seng-ha ka jingialang ba dang shen bad ki tnad bapher bapher kynthup ka tnat Pule Puthi, Tnat Pulit, Tnat Ain, Tnat ka Koit ka Khiah bad kiwei kiwei.
“Ka dei ban don ka SOP ba kin hap ban bud namar bunsien ki khynnah haba ki shah ialam shabar, ka Sorkar kam don jingtip satia shaphang jong ki bad dei tang haba jia kano kano ka jingjia ba ngi sa ioh jingtip. Kumta ngi donkam ban tehlakam da kaba pynthikna ba ngi dei ban tip shano kine ki khynnah ki don. Kumno ka rukom im jong ki bad kiei ki jaka pule bala phah ia ki. La ki dei ki jaka pule ba ithuh da ka ain, wat ki hostel ruh la ki dei kiba la ithuh” kala ong.
