Khliehriat, Jylliew 28: Ki nongialam ka Jaiñtia National Council (JNC) Sengkmie, kaba la ialam da u President rangbah ka seng u Bah Sambormi Lyngdoh, hynnin ka sngi, ki la leit ban kynduh ia u Ma Kyrmen Shylla, MLA Khliehriat, uba long ruh kum u nongaibuit ia ka tnad Mining Geology ha ka sorkar jylla bad kata ka long ban kyrpad na u Ma Kyrmen Shylla, ba un kren lem ia ka sorkar jylla, halor ka jingpyntreikam ia ka pisa kaba la lum lyngba ka Meghalaya Environment Protection and Restoration Fund (MEPRF), kaba long ban ai jingiarap ia kito ki lanot kiba la shah ktah hadien ba la khang ia ka kam tih Dewiong bad ruh na bynta ban pynbha biang ia ka Mariang, ha kito ki jaka ba la dep ban tih Dewiong.
Haba kren sha ki lad pathaikhubor, u Bah Sambormi Lyngdoh, u la ong ba naduh ka por ba ka NGT ka la khang ban ka tih Dewiong ha u snem 2014, ka NGT ka la bthah ia ka sorkar jylla ba ka dei ban shim ia ka khajna kaba shiphew persen na ka jingshalan ia u Dewiong ba la dep ban tip, kata lyngba ki Chalan, khnang ba ia katei ka pisa yn pyndonkam ha ka ban pynbha pynmiat ia ki jaka la jot la pra na ka jingtih dewiong bad ruh ban ai jingiarap sha kito ki longiing kiba la shah ktah.
U la ong ruh, ba ha ka jingwad RTI, ka la pynglynngoh shibun eh ia ka seng, namar katkum ki jingkylli balah buh ba haduh katno ngut lah ioh iaki jingiarap bad kaei kaba ka Mining and Geology kala leh naka bynta kine ki briew, kaba pynsngewsih ka long baka jubab da kaba ong “Not available”.
Sa pule ruh: Bteng U MLA Mawryngkneng Bam Sam Ia Ki Skhim Kam Pynroi Sha Ki Paidbah Ka Constituency
Kumta lyngba ka jingioh kynduh ia u Ma Kyrmen Shylla, ngi la ioh ban pynpaw halor kata ka jingsngewkhia na bynta ki briew lajong, khamtam ia kito kiba shah ktah, ngi la kyrpad ia ka sorkar jylla lyngba u Ma Kyrmen Shylla, ba u dei ban phah bthah ia ki District Level Committee, ban leh ia kaba don da kaba Survey ia kito ki longing longsem kiba shah ktah bad ban ai ruh ka jingiarap lyngba ka MEPRF, namar ngi la lap ba ka don haduh T. 400 klur tam ka kaba la don na kaba lum shiphew persen na ki Challan Dewiong, la ong u Bah Sambormi Lyngdoh.
Shuh shuh, u la ong ba dang ha kine ki sngi, ha ka jingiakynduh ki Association ba trei Dewiong bad u Chief Secretary ka jylla, la iohi ba wat u Chief Secretary ula ong ba don ka fund jong ka MEPRF, na bynta ban ïarap ia kito kiba shah ktah hadien ba la khang ka kam tih Dewiong, namarkata, ka seng ka buh jingkylli ia u Chief Secretary bad ia u Myntri ka Mining and Geology, ba balei ym shym la pyndonkam ban ïarap iakito kiba shah ktah, namar kumba ka long mynta, ka ioh ka kot kala hiar ha East Jaiñtia ka jong ngi bad iaka jylla hi baroh kawei, naduh ka por ba la khang ka kam tih Dewiong.
Ka seng namarkata, ka ban jur ba kan sa pynbor iaka sorkar jylla, ba ka dei ban pynioh ia ka hok jong u paidbah, kumba ka NGT ka la dep ban bthah ia ka sorkar jylla.
Sa peit ruh
