Shillong, Nailar 07: U Myntri Rangbah ka Jylla u Conrad K Sangma ula pyntip baka Sorkar kala bthah iaki ophisar bad iaki Deputy Commissioner (DC) ban pynbiang iaka kaiphod halor ka jinglap u Justice Katakey ba jah rngai 4000 metric ton u dewiong.
Haba kren shaki lad pathai khubor, u Conrad ula ïathuh ba hadien bala ioh pdiang iaka kaiphod jong u Justice Katakey, ka Sorkar kala shim khia bad kala bthah iaki tnat ba dei khmih ban leh iaka ba donkam.
“Ngi la phah tohkit bad ngi la bthah iaki ophisar bad iaki deputy commissioner ban tih bniah halor ka kaiphod ba jah rngai 4000 metric ton u dewiong bad hadien ba ka Sorkar ka ioh pdiang iaka kaiphod ngin sa leh iaka ba donkam” la ong u Conrad.
U Conrad ula pyntip ruh ba ka jingtih dewiong daka juk stad mynta (Scientific Mining) hapoh Meghalaya kala sdang bad kumba 9-10 trok u dewiong la dep shalan sha bar ka Jylla hadien ka jingmynjur naka tnat Coal India bad Coal Ministry ka Sorkar India.
Ula ong ba dang shen ka tnat Coal India bad Coal Ministry Sorkar Pdeng kila wan jurip haki thaiñ ba tih dewiong hapoh ka Jylla bad kila pynpaw ruh ka jingsngewhun haba iadei bad ki kam haba iadei bad ka Scientific Mining.
Ula pyntip ruh ba haduh mynta kila don 20 ngut ki trai par dewiong kiba la mynjur ban tih dewiong daka juk stad mynta (Scientific Mining) bad mynta ka Sorkar Jylla ka dang pynkhreh iaki jingdonkam khnang ba kine ki trai par dewiong kin ioh License.
Haba juba iaka jingdawa u Nongialam ka Liangpyrshah ban phah tuklar haka Supreme Court halor ki kam beain dewiong, u Myntri Rangbah ula ong “Ha kano kano ka por ba ka Sorkar ka ioh jingujor ba don ka jingtih ne khaïi beain dewiong, ka Sorkar Jylla ruh ka leh daka ba tyngeh lada lap iaki ba donkti”.
