Shillong, Nailar 07: U Myntri Rangbah ka Jylla Meghalaya u Conrad K Sangma hynne ka sngi ula ther kylla ïa u Nongialam ka Liangpyrshah u Dr Mukul Sangma daka ba ong ba ka jingsdang ban pyntlot iaka Garo Hills Autonomous District Council (GHADC) kadei hi bala sdang naduh ka por ba ïalam daka EC jong ka Congress.
Lah ban kdew ba dang shen u Nongialam ka Liangpyrshah u Dr Mukul Sangma uba dei ruh u Myntri Rangbah barim ka Jylla ula kynnoh baka Sorkar MDA ba mynta ka kwah ban pyntlot iaka GHADC namar la palat 42 bnai ki nongtrei ka Council kim ioh tulop namar ka jingbym pyllait ka Sorkar iaka bhah tyngka.
Haba kren shaki lad pathai khubor u Conrad ula ong ba ka GHADC kala sdang tlot ka rukom treikam naduh ba synshar daka EC ba ïalam daka Congress namar ka jingthungkam laitlan khlem da pyrkhat iaka pla tyngka jong ka Council.
U Conrad ula ong ba haka por ba ïalam ka Congress iaka EC, ki don palat 2000 ngut ki nongtrei ha GHADC bad ka jingpynlut man u bnai ban siew tulop ka long T.6 haduh T.7 klur katba ka jingpynmih pisa naka Council ka long tang T.1 klur haduh T.2.5 klur.
U Conrad ula pyntip ba hadien baka NPP ka ioh bat iaka EC ha GHADC, ka Sorkar Jylla kala dep pyllait T.120 klur kaba dei ka bhah jong ka khajna bad lyngba kane ka pisa ka Council kala ioh ban siew iaka tulop jong ki Nongtrei.
“Ka Sorkar Jylla ka la dep ban pyllait lut ïa ka bhah khajna sha ka District Council. Kam don kano kano ka bhah pisa ba dang sah” la ong u Conrad.
U Myntri Rangbah ula ong ba ka Sorkar Jylla kam don jingkitkhlieh ban siew tulop ïa ki nongtrei jong ka GHADC hynrei ka jingkitkhlieh jong ka Sorkar ka long ban ïasam ïa ka khajna halor ka bhah shaki Council.
“Ka jingeh ban siew tulop kaba dang sahteng ka dei naduh mynshwa. Ka dei ka jingeh kaba khraw bad ka Sorkar Jylla ka la ai ka jingkyrshan iaka GHADC da kaba pyllait ha ka por kaba biang ïa ka bhah jong ka khajna” ula ong.
Haba kynnoh ba ki jingeh ha GHADC kidei kiba la thaw hi daka EC barim, u Myntri Rangbah ula ong “Ki jingthung kam be-aiñ” ki la jia ha GHADC ha ka por ba dang synshar ka Congress. “Mynshwa ka council kam shym la bud ia kino kino ki kyndon thungkam bad kine kidei ki daw bah ba ki nongtrei mynta kim ioh tulop”.
