Shillong, K’lyngkot 10: Ka Kynhun Snow White,kaba dei kawei na ka kynhun tem ba paw ha ka jylla mynta ka sngi ka la pynlong da ka ‘Concert’ shi bynta ban kynmaw burom ia uwei na u dkhot ka kynhun ba la tip kyrteng kum u Manfilson Lyngdoh bad uba ju khot ieit u Bah Hep uba la khlad noh na kane ka pyrthei ha u snem 20217.
Ia kane ka Concert ba la kynmaw burom ia utei u dkhot ka kynhun la pynlong ha Riatsamthiah da ka kynhun ne Band Snow White bad la ia trei lang ruh da ka Seng Samala Riatsamthiah bad la kyrshan lang ruh da ka Dorbar Shnong Riatsamthiah bad ka Meghalaya Aids Control Society.
Kane ka jingpynlong ia kane ka jingiaput ia tem, kam dei satia tang ban kynmaw burom ia u Samla Manfilson Lyngdoh, uba dei u dkhot ka Band ba shim ia ka bynta kum u lead guitarist, hynrei ka dei ruh shi bynta ka jingrakhe ia ka jingdap 25 snem ba ka kynhun Snow White ka la iaid lynti ha kaba put ba tem kum kata ka kynhun rwai ba paw hapoh ka jylla.
U Rangbah Shnong ka Riatsamthiah, haba ai jingkren, u la ong ba ka phang jong kane ka Concert ka long ban ong ‘Em ia u drok’ bad kaba long ruh kaba don nongrim bha ban kynmaw burom ia Manfilson Lyngdoh, ba ka Shnong Riatsamthiah ka sngew sarong halor u synniang u bynhei ba u manfilson Lyngdoh u la synniang lyngba ka put ka tem bad ka rwai ka siaw.
