Jowai, K’Lyngkot 11: Ka West Jaiñtia Hills District ka la nang pynkhreh shaid shaid ban pynlong ia ka 6th Meghalaya Games 2025, ha kaba la sakhi ba ki jingtei bapher bapher ki la sdang ban dep lut hashwa ka jingplie pyrda ia kane ka lympung ialehkai sport kaba heh jong ka jylla Meghalaya.
Na ka liang ki bor pyniaid district ka West Jaiñtia Hills lem bad ki nongpyniaid ia ka Meghalaya Games ki la nang treishitrhem ban pynlong ia kane ka lympung kaba shongkun bad kaba jop da kaba pynbit pynbiang ia ki madan ialehkai, ki jaka sah bad kiwei kiwei ki jingdonkam kin long kiba bit ba biang.
Ha kane ka lympung ialehkai jong ka Meghalaya Games kin don haduh 29 tylli ki jait jingialehkai (disciplines), kaban sdang naduh ka 20 tarik Kyllalyngkot haduh ka 25 tarik Kyllalyngkot 2025, ha kaba ka Swimming yn pynlong hapoh ka Crinoline Pool bad ka Golf yn pynlong ha Assam Rifles, Laitkor
Kiwei kiwei ki jingialehkai ba kynthup ia ka Archery, Arm Wrestling, Athletic, Badminton, BasketBall Boxing, Cycling, Football, Gymnastic, Judo, Karate-Do, Kho-Kho, Muay Thai, Shooting, Softball, sports climbing, Table Tennis, Taekwondo, Lawn Tennis, Volleyball, weightlifting, wrestling, wushu, Traditional sports, Roll Ball, Yogasana bad Lawn bowling yn pynlong ha kylleng ki jaka jong ka sor Jowai, ba kynthup ha Wahiajer bad Khliehtryshi jong ka West Jaintia Hills District.
La pyntikna ruh ba kin don haduh 3899 ki nongiashimbynta na kylleng ki district jong ka jylla Meghalaya. Ka jingplie pyrda lane ka Curtain Raiser jong ka 6th Meghalaya Games yn pynlong ha ka 13th Kyllalyngkot 2025 ha ka por 1.00Pm ha District Library Auditorium, Mynthong, Jowai.
Ha kane ka sngi yn wan ban shimbynta da u Myntri ka tnad Sports and Youth Affairs Bah Shakliar Warjri, u MLA bad Chairman MUDA Bah Wailadmiki Shylla nalor kiwei kiwei ki heh ka sorkar jylla.
