Shillong, Nailar 10: Ka jinglap noh ia u samla ba jah ha Karnataka ka long shisha ka khubor kaba ai jingkmen biang ia ki kmie ki kpa, ka ing ka sem bad ka kur ka jaid, namar mynta ka sngi u samla Kwis Sumer, 19 snem ka rta uba la jah ha Karanatka u la wan poi biang sha la ïing la sem kaba dei da ka jingshim khia ka sorkar jylla lyngba ka tnad Pulit ryngkat ki rangbah ka kur Sumer.
Kum ban pynkynmaw, u Samla Kwis Sumer u dei uba shong basah ha ka shnong Muktapur ba hap ha West Jaintia Hills bad une u samla u la jah ne bakla lynti katba u dang shong da ka Rel na Bengaluru ban leit sha Hubballi ha Karnata ha ka jingleit wad kam wad jam ia lade da ka jingthmu ban leit trei sha Karnataka.
Kumba la paw, kane ka jinglap biang ia u Samla Kwis Sumer uba la jah sha Karnataka, ka dei ruh lyngba ka jingshim khia u Dr. DRL Nonglait kum uwei u nonghikai ha ka skulbah NEHU, hakaba hadien ba u la ioh jingtip ne pyntip da ka kmie bad ka kur u la ia kren bad u Myntri rangbah ka jylla u Conrad K. Sangma uba la shim khia ban phah tohkit ne leit wad ka kynhun ki Pulit na ka jylla.
Kumba la iathuh ruh haduh ar sien ki rangbah ka kur Sumer lem bad ki Pulit ki la leit sha Karnataka ban leit wan ia une u samla ba la jah, hynrei kane ka la pulom noh bad dei hadien ki khyndiat sngi ba la ioh jingtip ba u don ha kawei ka jaka la phah biang ia ki bor pulit bad lap syndon ia une u samla uba la jah ha Karnataka.
Pule ruh: Pyneh Triang Ki Nongdie Madan Ha Jail Road Wat La Pynap Ka Municipal Da Ki Bor Pulit
Ha ka jingwan poi mynta ka step ha Shillong la pynlong ia ka jingiakynduh lang ha State Guest House ha Shillong ba la don ryngkat naduh u rangbah kur ka Kur Sumer u Rev. H.C.T Sumer, ki rangbah kur bad ryngkat u Dr. DRL Nonglait, kiba la pynpaw ia ka jingkmen ba la lah ban lap biang ia une u samla ba jah ha ka jingleit wad kam sha Karnataka.
Naduh u Dr. DRL Nonglait, u Rev. H.C.T Sumer, kiba haing hasem hadien ba la wan shaw ia u Samla Kwis Sumer, ki la ai khublei kyrpang ia u Myntri rangbah ka jylla u Conrad K. Sangma ba dei lyngba ka jingshim khia jong u kum u myntri rangbah ban phah leit wan ba la lap ia une u samla ba la jah ha Karnataka.
Ki la pynpaw ruh ba kane ka jinglap noh ia u Samla Kwis Sumer ka dei ka jingiatrei lang naduh ka sorkar jylla, ki tnad pulit ka jylla, ki heh nongialam ka Kur Sumer, ki Pulit ka Karnataka bad ruh ka KSU Bangalore Unit, kiba la ia trei lang ban wad haduh ba la lap ia une u samla bad ba la lah ban wan shaw biang ia u ban wan poi sha la shnong ku ba u la wan poi mynta ka step sha Shillong.
Peit ruh:
Shuh shuh, la ia kren ruh ba kane ka jingjah une u samla ka long kum ka jingkyrsiew thiah ia ka ing ka sem, ka kur ka jaid bad wat ia ka sorkar, namar haba kino kino ki samla ki mih na la ing ban leit trei sha kiwei ki jylla ki dei ban pyntip shwa khnang ban mih kum kine ki jingjia ba sngewsih bad kaba pynjynjar ia ka ing ka sem bad ka kur ka jaid.
