Ka phlim Hindi bala ai kyrteng Kill, kan long ka phlim ba nyngkong haka history jong ki phlim Hindia ban ioh pyni ha palat hajar tylli ki cinema ha North America bad kane ka sienjam jong katei ka phlim kan long pynpaw ruh ka jingnang roi bad kiew ka phlim Hindi ha satlak ka pyrthei.
Ka jingpaw pyrthei, ka jingjop bad ka jingseisoh jong katei ka phlim ka dei ruh lyngba ki International Film Festival bapher bapher bad khamtam ka Tribecca Film Festival bad ïa ka trailer jong katei ka phlim la pynlait dang ha kine ki khyndiat sngi, kaba la ioh ruh ka jingïaroh na kiba bun ki paidbah kiba ju sngewtynnad ban peit phlim, bad khmih lynti ba katei ka phlim yn pynlait paidbah noh shen haki cinema.
Katei ka phlim ka dei ruh kaba la lamkhmat da ki tyngshop ki puron kiba dang thymmai ba kynthup ïa u Lakshya, Raghav Juyal bad ka Tanya Maniktala bala pynmih da ka Dharma Productions bad Sikhya Entertainment bad ka khana lyngkot jong katei ka phlim ka long kaba pynktik ïaki paidbah ha kaba u Lakshya u la shim ïaka bynta kum u shipai u ba la shong ruh da kawei ka rel ban ïakynduh bad ka baieid bala shim bynta da ka Tanya Maniktala shuwa ba ki kmie ki kpa jong ka ki kin phah ïathoh shongkurim ïaka bad uwei pat.
Katei ka jingïaid lynti ka long kaba eh ha kaba katei ka rel kala shah rahbor haki kynhun runar bala pynbor ruh ïa u shipai ban ïakhun bad ban ïada ïala ka baieid, bad ïa katei ka phlim la khmih lynti ba yn pynlait paidbah haka 5 tarik Naitung haka ri India.
‘KILL’ KA PHLIM HINDI BA NYNGKONG BAN PYNI PALAT HAJAR TYLLI KI CINEMA HA NORTH AMERICA
