Shillong, Naitung 04: Naduh ki nongialam ka Ryntih Football Club bad ki heprit kiba hapoh ka rta kaba 14 snem ki la pynpaw ia ka jingkmen ban ioh leit shim bynta ha ka International Iber Cup 2026 kaba long ha ka ri Portugal. Kane ka Iber Cup ka la sdang naduh ka 29 tarik u Jylliew bad kan kut haduh ka 5 tarik u Naitung 2026.
Kum ban pynkynaw, kane ka lah ban dei ka sien kaba nyngkong ba ka kynhun ki heprit na ka jylla Meghalaya ki ioh ban leit shim bynta ha ka Iber Cup, ba bun ki kynhun na ki ri ka pyrthei ki la wan ban shim bynta ha kane ka Iber Cup.
Kumba la iathuh da u CEO ka Ryntih Football Club, u Bah Evarist Myrsing, la ong ba ka long shisha kaba eh ia ki heprit ba ai aireng bad kiwei ki kynhun ka pyrthei kiba la pyntbit bha ha ka kam ialehkai phutbol bad wat la katta ruh ki heprit ki jong ka Ryntih Football Club kim shym la kynran dien bad ki la pyrshang ban sei ia la ki sap ki phong kaba ki don.
U la iathuh ruh ba kynhun Ryntih FC jong ka under-14 ka hap ban ia khhun ia kiwei ki kynhun ba la tbit jong ka pyrthei kum ka Brazil, ka Spain bad kiwei dei, kiba la biang bha ka shlem ai jinghikai haba ia unjor bad ka Ryntih Football Club kaba dang duna bha ha ka liang ka shlem ai jinghikai.
Naduh u CEO ka Ryntih bad wat ki heprit ki ba la leit shim bynta, ki la pynpaw ba ha kawei ka bynta ki sngewkhia ba shuwa ban leit sha kum kitei ki lympung kim shyn la ioh iaka jinghikai pyntbit kumba long kiwei kiwei ki kynhun na ki ri ka pyrthei, hynrei ha kawei ka bynta pat ki pynpaw ba ki sngewkmen pat ban ioh ia kum kane ka kabu ban ioh ia aireng bad kiwei ki kynhun kiba la biang bha ha ka rukom ai jinghikai ha ka liang ka phutbol.
Ki la pynpaw ruh kam pher la jop ne rem, hynrei kane ka dei kum ka jingsdang ban ioh shim bynta ha kum kine ki lympung ialehkai phutbol kaba heh ha ka pyrthei bad ki khmih lynti ruh ba nangne shakhmat kin dang lah ban pyntbit bad ruh ban tip ia ki rukom ialehkai da ka jingioh mad ban ia aireng ia ki kynhun kiba la tbit ha ka kam ialehkai phutbol.
Shuh shuh, na ka liang ka Ryntih Football Club bad ki heprit ki pynpaw ia ka jingsngewnguh ia ka Sorkar Meghalaya, u u myntri rangbah ka jylla u Conrad Sangma, u Sports Minister u Ma Wailadmiki Shylla, u Bah AL Hek & Adelbert Nongrum, kum ki MLA kiba la ailad ryngkat ki jingkyrkhu kyrdoh jong ki ba kane ka kynhun ka la ioh lad ban wan shim bynta ha kane ka Iber Cup ha ri Portugal.
Sa peit ruh
