Shillong, Jymmang 22: Ha ka jingjia shah lute kawei, ka ATM jong ka State Bank of India kaba don ha ka shnong Mawkriah, East Khasi Hills District ka la shah lute ha ki snar nongtuh bym lah ithuh durkhmat kiba la ioh ban rong tuh ia ka pisa kaba la kot kumba 28.13 lakh tyngka kaba la thep ha katei ka ATM mashin.
Katkum ka khubor ba la iohlum, la iathuh, ba kane ka jingjia shah lute jong katei ka ATM ha ka shnong Mawkriah ka la jia ha ka step phyrngap jong ka 21 tarik Jymmang ha ki por 3 baje mynstep.
La ioh jingtip ruh, ba ki snar nongtuh kiba la donkti ban lute ia katei ka ATM la suba ba ki dei kiba na shabar ka jylla namar ka rukom tuh ia katei ka ATM ka la long kaba syriem bad ki jingshah tuh ki ATM ha kiba bun ki bynta jong ka jylla Assam, ha kaba ki nongtuh ki la pyndonkam da ki tiar kum ka gas cutter ban ot ia ka mashin.
Katkum ka jingioh ring dur na ki kor CCTV camera, la iohi ba ki don saw ngut ki snar nongtuh kiba la rung hapoh katei ka ATM mashin ban leh ia kane ka kam lute pisa. Na ka liang ki bor pulit ki la register mukotduma ha Mawngap Police Station bad ka jingtohkit ban thwet ia kiba donkti ka la nang iaid shakhmat.
