Shillong, Rymphang 13: Kum u Member Legislative Council ka Bihar (MLC) bad uba dei ruh u Convener ka Budget Publicity Campaign ka North East, u Devesh Kumar haba kren bad ki nongthoh khubor ka jylla Mynta ka sngi u la pynpaw ba la donkam ka jingkyrshan ki trai jylla lane ban kyrshan ia ka sorkar na ka bynta ban poi ia ka surok rel sha ki 3 tylli ki jaka hapoh ka thain North East kaba kynthup ruh ia ka jylla Meghalaya.

“U Myntri rangbah ka ri, u Narendra Modi u kwah ba kawei pa kawei ka jylla ha ka ri de ban don ka surok rel bad donkam pat ka jingkyrshan jong ki trai jylla” ong u Kumar bad pynpaw ruh ia ka nuksa kum ka Mizoram ba la lah ban wan rah dang shen ia ka surok rel na ka bynta ban kyntiew ia ka ioh ka kot ki paidbah.

U la ong ruh dang don sa 3 tylli ki jylla ha North East kiba ym pat poi ka surok rel, ha kaba ka sorkar kmie ka la kloi ban wan rah ia kasurok rel bad ban pynurlong ia kane donkam ka jingkryshan jong ki trai jylla.

Ka National Spokesperson ka BJP, ka Shazia Illmi ka la pynpaw ia ka jingsngewkhia ba dang don ki jylla kiba ym pat poi ka surok rel  bad ka don pat ka jingkyrmen ba baroh ki jylla khamtam ha North East ban poi noh ka surok rel lyngba ka jingkyrshan ki trai jylla.

Shuh shuh, ka la ban khia ruh ba ka thong ka sorkar kmie ban wan rah shibun ki kam pynroi bad ki jingdonkam ki paidbah ha ki liang baroh, ha kaba ka sorkar ka phai khmat kyrpang ban pynurlong kumba la buh thong na ka bynta ki paidbah bad ka ri.