Shillong, Rymphang 13: U Nongaiktien ba hakhmat eh ka Party BJP Meghalaya u Bah M. Kharkrang mynta ka sngi u la ong ba ka party ka dang ap ia ka kaiphod jong ka Judicial Inquiry Commission ba la thung da ka sorkar jylla, ha kaba ia dei bad ka jingjia jong ka jingbthei bom ha par dewiong ha Mynsngat East Jaintia Hills ba haduh 30 ngut ki nongtrei ki la duh ia la ka jingim bad bun ngut kiba la mynsaw.

“Ka sorkar kala shim khia halor kane ka jingjia bad ka la pdiang ruh ba ka la don kum kane ka jingjia ba sngewsih bad ka long kaba donkam ban iai ap shwa haduh ban da dep ka jingtohkit” ong u Bah Kharkrang sha ki Nongthoh khubor.

Haba kylli kaei ka jingsngew ka BJP halor katei ka jingjia, u Bah Kharkrang u la ong ba la dep ban register case bad la don ruh kiba la shah kem. Ka sorkar ka la dep thung ruh da ka commission ban tohkit bad ia mynta ngin iai ap ia ka kaiphod ka jingtohkit ka Commission, u la ong.

Halor katei ka jingia, u la ong ruh ba wat u Myntri rangbah ka ri u Narendra Modi  bad u Myntri ka sorkar pdeng ba peit ia ka tnad ka kam pohing, ki la dep kren sha u Myntri rangbah ka jylla Meghalaya ban wad jingtip kaba bniah halor kane ka jingjia, ha kaba na ka liang u Myntri rangbah ka ri ruh u la dep pynbna ruh ia ka lad jingiarap (Ex-gratia) sha kito kiba la shah ktah ha shwa ba ka sorkar jylla kan ai jingiarap.

Shuh shuh, haba kylli pat halor ka jingdawa ba la don kiba dawa ban iehnoh kam noh u myntri rangbah ka jylla na katei ka tnad kaba u bat ia ka Mining , u Bah Kharkrang u la ong ba ngin nym lah ban ong ia u Myntri rangbah ka jylla ban iehnoh ia katei ka tnad kaba u bat tang namar kateika jingjia, namar ka long kaba donkam ba ka sorkar jylla ka la shim khia bha ia kane ka kam ban ia kaba u Myntri rnagbah ka jylla u hap ban iehnoh kum u myntri ia katei ka tnad kaba u bat, u la bynrap.