Shillong, Naiwieng 20: U Symbud Myntri Rangbah ba khmih iaka tnat Urban Affairs u Bah Sniawbhalang Dhar u la ong ba ka Sorkar ka dang pynkhreh iaka Details Project Report (DPR) kynthup ban pynpra iaka Meghalaya Legislative Assembly kaba don ha Khyndai Lad.
Kane ka DPR ka dei ruh shi bynta ban pynitynnad iaka thain Khyndai Lad baroh kawei bad ka Sorkar kala don ruh iaka Plan ban pynkylla dur iaka Khyndai Lad kaba dei ka thain ba tuid bha ki paidbah ha nongbah Shillong.
Haba kren shaki lad pathai khubor u Bah Sniawbhalang u la ong ruh ba ki jingtei iaki Shopping Complex bad ki jaka ieng kali (Parking Lot) ha Khyndai Lad kila dep palat 80% bad la kyrmen ba hapoh u Naitung 2026 yn plie paidbah lut ia baroh ki jingtei thymmai.
U Bah Sniawbhalang u la pyntip ba hadien bala pynkynriah iaka Meghalaya Legislative Assembly, ka Sorkar kan sa sdang noh iaki kam ki jam ban pynkylla dur bad ban pynitynnad iaka Khyndai Lad.
“Ki jingpynkylla dur iaka Khyndai Lad kim dei tang ban plie iaki Shopping Complex ne ki jaka ieng kali (Parking Lot) thymmai hynrei kan dei ruh ban shna thymmai ki jaka iaid kjat, Rope Way, ki jaka ieng kali bad kiwei kiwei ki jingdonkam naka bynta ki nongleit nongwan hapoh ka thain kynthup ki nongwan shangkai pyrthei” la ong u Bah Sniawbhalang.
U Bah Sniawbhalang u la iathuh ba hadien bala dep ban pynkhreh iaka DPR ka Sorkar kan sa khot thep Tender ban pyntrei iaki project bapher bapher hapoh ka thain Khyndai Lad.
U Symbud Myntri Rangbah u la ong ba ka Sorkar ka kwah baka thain Khyndai Lad kan dei ka jaka iaid kjat kaba itynnad tam ym tang hapoh ka thain Shathei Lammihngi (North East) hynrei hapoh ka Ri baroh kawei hynrei u la bynrap daka ba ong “Ki don ki nong shong shnong hapoh ka thain kiba la pynsngew ba lada khang iaka surok kan buh jingeh iaki bad mynta ka Sorkar ka dang iakren bad ki ban pynbeit iaka por shah iaid kali”.
Shuh shuh, u la ong baka Sorkar kala shim khia bad mynta ka dang pynkhreh ban maramot iaki surok kiba don hapdeng ka Khyndai Lad, kata ban bujli iaki Tiles ba siang shilynter haki surok jong ka thain.