Shillong, Naiwieng 20: U Myntri ka tnat Tourism u Timothy D Shira u la pyntip baka Sorkar ka dang pynkhreh iaka jaka ba thymmai ban pynlong iaki tamasa bapher bapher.

U Myntri u la pyntip ba ka jaka ban pynlong iaki tamasa haki snem ban wan kan dei shabar ka nongbah Shillong.

“Ka jaka thymmai ban pynlong iaki tamasa bapher bapher kan dei shabar ka nongbah Shillong bad mynta kane ka jaka ka dang don hapdeng ka jingpyntrei bad dei na kane ka daw iaka Cherry Blossoms Festival 2025 la hap ban pynlong ha JN Stadium Polo Shillong” la ong u Timothy.

Haba kren shaki lad pathai khubor u Timothy u la kam baka tamasa ba dang shu kut ka Cherry Blossoms Festival  2025 ka long kaba seisoh.

“Nga ong baka Cherry Blossoms Festival 2025 ka long kaba seisoh namar ka tamasa kala sakhi ka jingwan tuid ki briew kynthup ki nong wan shangkai pyrthei na bar Meghalaya bad na bar India” u la ong.

Haba kylli u Myntri u la ong “Ngam don jungkhien katno ngut ki poi ki briew kynthup ki nongwan shangkai pyrthei hynrei ngan sa pan ka kaiphod naki officer bad ngan sa pyntip sha phi” u la bynrap.

U Myntri ka tnat Tourism u la pynpaw ruh baka Sorkar ka pdiang iaki jingshah kynthoh haba iadei bad ka jingpynlong iaka Cherry Blossoms Festival 2025 ha Polo. “Ki jinshah kynthoh kin don beit wat lada phi leh iaka ba bha ne phi leh iaka ba sniew. Ngim kynnoh iaki ba kynthoh hynrei ngi pdiang iaki jingshah kynthoh” u la ong.

Haba iadei bad ka Megong Festival 2025 ka ban long haka 5-6 tarik Nohprah, u Myntri u la ong ba ka jingpynkhreh mynta ka dang iaid shaid shaid.

U la pyntip ba ka jaka ban pynlong iaka Megong Festival 2025 kan dei hapdeng ka Williamnagar bad Jenjal hajan ka surok bah (National Highway-51).