SHILLONG, SEP 01: Ha ka jingrakhe dap 14 snem ka NPP bad ruh ka jingrakhe ia ka sngi kha ba 79 snem u (L) Purno Agitok Sangma kum u nongseng ia ka NPP party, u Bah Prestone Tynsong kum u Symbut Myntri ka sorkar jylla, u la ong ba ka sorkar ba la ialam daka NPP ka dang skhem haduh u snem 2028, namar ka party NPP ka don haduh 33 ngut ki MLA kaba la biang pura ban thaw sorkar.
Kine ki kyntien ki la mih na ka shyntur u Bah Prestone Tynsong, ka dei hadien ba ha kine ki sngi la mih ki khubor hamsaia bad ba la paw ruh sha ki lad pathai khubor ba haduh 9 ngut ki MLA UDP kin pyniasoh sha ka BJP Party.
U la ong ruh ba u la iohi tang ha ki lad pathai khubor bad um lah ban tip halor kata ka jingthmu pyniasoh sha ka BJP bad kane ka lah ban dei ba ka don ka jingiapher jingmut hapoh ka party UDP.
Shuh shuh, u la ong ruh ba ka NPP party kam donkam ban kren ei ei halor kane, hynrei ka party NPP ka dang skhem bad kan dang lah ban ialam ia ka sorkar haduh u snem 2028, namar ka party NPP ka la don 33 ngut ki MLA bad ka la biang pura ban ioh bat ia u lakam synshar ha ka jylla, u la bynrap.
