Nongpoh, Nailur 01: Ki kynhun kiba trei miet la bad sngi ban wad iaki briew kiba dang rngai, ki la lap haduh kumba 24 tylli ki metiap tang na kawei ka ing haka shnong Betrawati jongka Bidur Municipality-10 haka thain Nuwakot, kiba la shah taplup haka ktieh hadien ka jingshlei kynsan ka umsaw myn haka 26 tarik mynta u bnai haki thain khappud ka Nepal bad Tibet.
Katkum ki lad pathai khubor, la iathuh ba kitei ki metiap lehse ki lah ban dei jong ki briew kiba phetrieh ban iada ialade hapoh katei ka ing haka por jongka jingwan lynshop umsaw kaba la shlei lyngba ka wah Bhotekoshi bad Trishuli. Ka jinglap ia kitei ki metiap kiba la sdang pyut, la pynthikna rud da ki bor pulit katei ka thain.
Ka jinglap ia kitei ki metiap, ka pyn-i iaka jingshyrkhei jong katei ka jingshlei ka umsaw kaba la jia naka daw jongka jingtwa kynsan u lum thah bad pynlong iaka jingshlei kynsan ka umsaw ha ryngkat ki maw, ki thah bad ki ktieh ha kiba bun tylli ki district ka ri Nepal.
Kat haduh mynta ka sngi, ka jingkhlad ki briew na katei ka jingshlei ka umsaw kala poi 1003 ngut bad kumba 3916 ngut ki dang jahrngai ba kynthup ia kumba 583 ngut ki nongjngohkai pyrthei bad ki spah ngut ki nongtrei haki jaka pynmih bording ilektrik, la ong ka tyllong khubor naka National Disaster Risk Reduction and Management Authority ka ri Nepal.
Ki tyllong khubor ki iathuh ruh ba palat 11800 ngut ki briew la ioh ban pyllait im lyngba ka jingtrei shitom ki bor shipao, pulit bad kiwei de ki kynhun naka ri Nepal bad ruh na ki ri ka pyrthei. La ong ruh ba ka jingbteng jongka jinghap slap, ka jingjulor ki surok nad ka jingmaham ba lehse kan dang jia biang ka jingshlei umsaw, kala pyndkoh shikatdei iaka jingpyrshang ban lap iaki briew kiba jahrngai bad ai jingiarap iaki briew kiba dang lait im.
Peit ruh:
