U Samla Roy Kupar Synrem President ka HYC Sengkmie u la byrngem tyngeh ia ki bor ka sorkar jylla khamtam ka tnad pulit kaba iai bteng ban pyrshang pyntroiñ ia ka jingthmu rad dyngkhong ia u drug, da kaba ong, ba kan sa poi ka por ba ka seng kan sa Thad madan ia ki kyrteng jong kito ki heh ki hain ne wat ia ki pulit kiba donkti ha ka kam khaii drug ne ban iarap ia ki nongkhaii drug hapoh ka jylla Meghalaya.
Ia kine ki kyntien la kren da u nongialam ka HYC Sengkmie ha ka jingleit ban synranlang ia u Bah Isaac Basawiamoit u ba la shah khot hajir hapoh ka Rynjah Police Station halor ka kam khynra drug ka seng ha kine ki bnai kiba la dep.
Lah ban kdew ruh ba ha 1 tarik Nailur 2024 ha kaba ka HYC ka la iohkem ia ki 3 ngut ki nongkhaii drug ha Society Colony Rynjah, ki pulit ki la wan ban khanglad ia ki nongialam ka Seng ban thang ia u drug ba la ioh kurup da ka seng.
Na ka liang u President ka HYC, u Bah Synrem u la ther tyngeh ia ki bor pulit ka jylla Meghalaya kiba pyrshang ban pynngat ha ki kyndon ain bapher bapher ia ki nongialam ka Seng da kaba thmu ban pyntroiñ ia ka jingthmu jong ka seng, hynrei u ne u nongialam u la ong, ba kane ka jingleh jong ki pulit kan nang ai mynsiem shuh shuh ia ki nongialam bad ki dkhot ka Seng ban iai treishitom ban rad dyngkhong ia u drug ha kaba ki paidbah nongshong shnong ruh ki iai ai ia ka jingkyrshan kaba radbah ia ka seng.
Ka HYC, ka la pynrem ruh halor ka ejehar ba la ujor da u wei i SI pyrshah ia u nongialam ka Seng da kaba ong ba wat pyrshang ban len lamler hynrei u dei ban kren ia ka jingshisha, namar lada iai jia kumne kan sa poi ka por ba ki paidbah kin mih da ki phew hajar ngut ban tur sha ki thanad bapher bapher kiba ju pyndik ia ki nongialam ne dkhot ka Seng.
