Nongpoh, Risaw 14: Ki paidbah Nongshong shnong Karbi ha Ri Bhoi District ki la mih shakhmat ban ai khublei kyrpang ia u Bah Mayral Born Syiem MLA ka Nongpoh Constituency, kaba dei halor ka Nongrim ba kum u nongmihhmat paidbah u la kren lem ia ka bhah ioh kam ioh jam lyngba ka State Reservation Policy kaba u la ai jingmut lang sha ka Expert Committee.
Kane ka jingai khublei ia u MLA ka Nongpoh, ka dei ka sur jong ki paid Karbi ha Ri Bhoi ha ka jingialam u Bah Diren Klein bad u Bah Komin Terang ryngkat ki nongialam ka Marmain Area Youth Upliftment (MAYU).
Katkum ka kyrwoh ba ki la phah sha ki lad pathai khubor, k la pynpaw ia ka m6nsiem jong ka jingsngewnguh ia u Bah Mayral Born Syiem, MLA ka Nongpoh Constituency halor ar tylli ki bynta ba kongsan kaba u la ai jingmut sha ka Expert Committee na ka bynta ban pynheh ia ka bhah ioh kam kiwei ki jaid bynriew rit paid kum ki Karbi, Rabha, Hajong bad kiwei kiwei ki jaid bynriew rit paid kata na ka 5% sha ka 10%.
Kane ka jingai khublei ki paid Karbi, ka dei ruh hadien ba u MLA ka Nongpoh u Bah Mayral Born Syiem ha ka 5 tarik u Risaw 2024 kum u nongmihkhmat na Ri Bhoi District, u la leit ban ai jingmut sha ka Expert Committee halor ka bhah ioh kam ioh jam katkum ka State Reservation Policy.
Ki la ai khublei ruh ia u MLA ka Nongpoh halor ka jingai jingmut sha ka Expert Committee na ka bynta ban pynthymmai ia ka rukom bhah kam bhah jam ha ka jylla bad ki la pynpaw ruh ba lada ka bhah kam bhah jam ka long ia ryngkat dor kan don ka jingkiew shaphrang ki samla bad ka jylla ha kaba ka jingthmu hi ka Reservation Policy ka long ban kham ai bhah ia ki jaid bynriew ba dang sahdien na ka bynta ban kiew lang ka jylla ha baroh ki liang.
Ki la pynpaw ruh lada phai katkum ka NITI AAYOG ka la dei ka por ba ka sorkar kan pynthymmai ia ka rukom bhah kam kaba long kyrpang na ka na ka bynta kito ki jaid bynriew ba dang sahdien. Ki la kyrpad ruh ia kane ka sorkar ba mynta ba ka dei ban pynheh noh ia ka bhah thungkam thungjam na ka 5% sha ka 10% bad 15%, namar ka long shisha kaba eh ban ioh kam ioh jam lada ka sorkar kam don kata ka jingbhah kam kyrpang ia ki jaid bynriew ba dang sahdien.
Na ka liang ki paid Karbi ki la kyrshan ruh ia ka jingai jingmut u MLA ka Nongpoh u Bah Mayral Born Syiem sha ka Expert Committee, ha kaba na ka bynta ka District Selection Committee (DSC), dei ban ai beit ka bhah ioh kam ioh jam tang ia ki samla trai District bad ym dei ban shah ia kiwie pat ki samla na kiwei ki District la ka long ha kano kano ka District.
Namarkata, na ka liang ki paid Karbi ki kyrmen skhem ba ka jingai jingmut u MLA ka Nongpoh sha ka Expert Committee ka long kaba biang tam ha ka liang ka bah thungkam thungjam na ka bynta ka lad ioh kam ioh jam bad ruh ban kyntiew ia ka ioh ka kot ki District, namar lada kino kino ki jaid bynriew ki dang sahdien ka jingsahdien ka long hi ha ka jylla baroh kawei. Ki khmih lynti ruh ba ka Expert Committee bad ka sorkar jylla kin pdaing ia kitei ki jingai jingmut jong u MLA ka Nongpoh kaba long ka jingmyntoi lang ha baroh ki laing, ki la pynpaw shuh shuh.
