Shillong, Lber 17: Ki nongri Syiar ha Ri Bhoi District mynta ka sngi ha ka lama ka Ri Bhoi Poultry Farmers Association (RBPFA) ki la leit syndon ban ia kynduh ia u Myntri ka tnad Animal Husbandry and Veterinary ka sorkar jylla, u Bah A.L Hek, na ka bynta ban pynsngew ia ka jingeh jongki kum kita ki nongri syiar ha Ri Bhoi District bad ha ka jylla hi baroh kawei.
Kumba la iathuh da ka President ka Kong E. Lapang bad u Vice President u Bah A. Diengdoh, ka daw kaba ki la hap ban leit kynduh ia myntri sorkar, ka dei ka jingshah khñiot bein palat ki nongri syiar ha Ri Bhoi, khamtam ha ka dor ka mut ha iew ha hat, kaba ki shah ktah na ka jingwan poi ki syiar kiba na shabar ka jylla.
Ki la iathuh ruh ha kane ka jingiakynduh, ym tang ba ki la pynpaw jingeh na ka jingshah khniot ka dor ka mur ha iew ha hat bad ki la pynsngew ruh sha u Myntri ba ka sorkar kan thaw noh ia kita ki lad jingiarap lyngba ki kynja subsidy ban iarap kyrpang ia ki nongri syiar kiba shem jingeh ha kaba thied ia ki jingbam syiar, kiba la kiew dor bah ha kine ki sngi.
Shuh shuh, ki la pynpaw ruh kaba pynkmen ruh ia ki kum kita ki nongialam jong kane ka seng ki nongri syiar na Ri Bhoi, ka dei ka jingkular u Myntri ban lum da ka jingialang ki nongri syiar, khnang ba kin lah ban thaw ia kita ki lad ki lynti ba iarap na ka sorkar sha kito ki nongri syiar hapoh ka jylla.
Shuh shuh, ki la pynpaw ruh ki la kren ruh halor ki syiar kiba wan na shabar ba ki shah khniot ha ka dor ka mur, hynrei ka jubab ba la ai da u myntri kumnba long haduh mynta ka long ba ka sorkar ka la khang ia ki syiar ba wan na shabar na ka jingdon ka khlam pang syiar kaba ki hap ban shim ia ki jingiada ban nym shah ktah ha kane ka jylla Meghalaya.
