Shillong, Lber 17: Ka tnat pule puthi lyngba ka ophis u Director of School Education and Literacy, Meghalaya, Shillong mynta ka sngi ki la pynmih hukum kyrkieh, ban thung ia ki ar ngut ki ophisar na ka bynta ban leit phah tohkit halor ka jingkhlad uweiu khynnah ba dang 13 snem ka rta ha kawei na ka Hostel ha jylla Karnataka.
Kum ban pynkynmaw, ka sorkar lyngba ka tnad pule puthi na ka ophis u Director of School Education and Literacy ka la pynmih kyrkieh ia kane ka hukum, ka dei hadien ba la mih ha ki lad pathai khubor, halor ka jingkynnoh ba uwei u khynnah ba dang 13 snem ka rta ula khlad ha ka rukom kaba kham pher ha katei ka Hostel kaba don ha Karnataka.
Katkum ka hukum ba la pynmih da Swapnil Tembe, uba dei u Director of School Education and Literacy, Meghalaya, Shillong, u la pynmih kyrkieh ia kane ka hukum bad la phah ia ki ar ngut ki ophisar ba kynthup ia u Bah P. Sunn, Sub Inspector of Schools, Sub Divisional School Education Officer, Shillong bad u Bah R. Kharsyntiew, District MIS, PM-POSHAN, Shillong ba kin leit kyrkieh sha Karnataka na ka bynta ban tohkit bniah halor katei ka jingjia.
Kumba la pynpaw ha katei ka hukum, la bthah ruh ba wat ki kmie ki kpa jong ki khynnah na Meghalaya kin leit lang sha katei ka Hostel ryngkat kitei ki ophisar na ka bynta ban wan bniah ne tohkit halor ka jingkhlad ba kyndit utei u khynnah na Meghalaya.
Shuh shuh, la pynpaw ruh kumba la phah ia kine ki ophisar ryngkat ki kmie ki kpa, hadien ba la poi ha katei jaka kin sa wad jingtip kaba bniah bad kin sa phah pat ia ka kaiphod sha ka sorkar jylla halor ka jingkhlad ba kyndit utei u khynnah ba dang 13 snem ka rta ha katei ka Hostel kaba don ha Karnataka.
Haba phai halor katei ka jingjia, la kynnoh ruh ba ka jingkhlad utei u heprit ka dei na ka daw ka jingbam ia ka bam kaba la sniew bad sahmiet bad bun ruh kiwei ki khynnah ki la kem pang bad ki dang don mynta hapdeng ka jingsumar ki Doctor.
