Ka Federation of Khasi Jaintia & Garo People (FKJGP) ryngkat bad ki bor ba dei khmih jong ka Shillong Municipal Board, ka tnad Labour, ka tnad Food & Safety lem bad ki pulit enforcement ka Khasi Hills Autonomous District Council (KHADC) mynta ka sngi, ki la pynlong ia ka jingkhynra Trading License ha ki thain Polo bad Demseiniong hadien ka jingioh jingujor halor ka jingbun jong ki bar jylla kiba leh ia ka kham khaïi pateng khlem ki kot ki sla kiba biang.
Ha kane ka jingleit khynra, la lap ia shibun ngut ki bar jylla kiba seng dukan bad leh ia ki kam khaïi pateng khlem don satia ia ki kot ki sla kiba biang kum ka Labour License bad kiwei kiwei de. Ha kane ka jingkhynra, la lap ruh ia ka jingdon jong ki Khasi kiba pynshah kyrteng lane kata kaba ki ong ka kam Benami bad ban pynlong ruh ia ka dukan kum ka jaka sah.
Haba kren sha ki lad pathai khubor hadien katei ka jingkhynra, u Chief Organising Secretary ka FKJGP, u Bah Khrawkupar Nongsiej u la iathuh ba ha kane ka jingkhynra, la lap pyllein pyllein ia shibun ki dukan bar jylla ki bym don satia ia ki kot ki sla kiba biang bad ki don ruh kiba don ia ki kot ki sla kiba la kut tarik bad kiba khlem pynthymmai shuh, hynrei ki la shu plie beain ia ka dukan ka jongki.
Ha kaba iadei bad ka jingleh Benami, utei u nongialam seng u la bthah ba kitei ki trai dukan kiba leh ia kitei ki kam, kidei ban pynbiang ia ka ki kot ki sla ki jongki bad kyntu ruh ia ka Shillong Municipal Board ba kadei ban shimkhia ban pynlong ia ka jingkhynra na ka por sha ka por.
Utei u nongialam seng u la iathuh mar sien ioh jingtip halor ka jingleit khynra jong ka seng bad ki bor sorkar, ki la don ruh ki dukan kiba khang khyrdep bad pyntip ruh ba ka seng kan nym aili hynrei kan sa buddien ia kine ruh da kaba pyntip ba ka seng kan sa leit ban kynduh ia u Chief Executive Officer ka Shillong Municipal Board ban ioh ia ki kyrteng jong kito ki dukan.
Halor kane ka bynta, na ka liang ka seng ka ai ia ka kyrwoh kaba shai ba ki trai dukan kidei ban bud ryntih ia ki kyndon jong ka Shillong Municipal Board bad khamtam ki dukan bam jong kitei ki bar jylla kidei ki bym don satia ia ka jinglehkhuid lehsuba bad kyntu ruh ia ki bor ba dei khmih ba kidei ban shimkhia ban leh ia kaba donkam pyrshah ia kitei ki dukan nangne shakhmat.
