Shillong, Jylliew 17:
Ka sienjam kaba la shim da ka Joint Action Committee (JAC) jong ki 11 tylli ki shnong kiba kynthup ia ka Umkiang, Ratacherra, Dona Skur, Dona Umbluh, Pyrtakuna, Kuliang, Borsara, Tongseng bad kiwei kiwei de kala nangioh bor shuh shuh hadien ba u Doloi jong ka Elaka Narput, u Bah Manbha Doloi u la ai ia ka jingkyrshan ba pura halor katei ka jingiakhih ka jongki ban pynbor ia ka sorkar ban shna noh mardor ia utei u surok National Highway 6 ha katei ka thain uba la jot rathai.
Kum ban shu pynkynmaw biang, ka JAC ha ka jingialang kaba la pynlong haka 15 tarik jong u bnai Jylliew ka la shim ia ka rai ban pynlong ia ka jingiakhih pakhang surok kaba khlem buh por, kaban sdang naduh ka por 7 baje mynstep jong ka 19 tarik u bnai Jylliew 2024 ban dawa na ka sorkar jylla, National Highway Authority of India (NHAI) lem bad ka National Highways and Infrastructure Development Corporation Limited (NHIDCL) kin maramot bad shna pyndep ryngkat ki nala um kiba paka naduh na Tongseng ter ter shaduh sha Malidor.
U Bah Manbha Kyndoh u la ong ba kum u nongialam jong ka Elaka Narpuh, um lah satia ban shu peit tang ki khmat halor katei ka jingeh kaba ki ia kynduh naba ka jingsniew kaba la palat liam jong kane ka surok kaba ym iahap shuh ban khot kata ka National Highway ka buh jingeh shisha ia ki paidbah ka thain bad kaba la shu dap tang da ki thliew ki syar suda ha shilynter.
Halor kane ka bynta, u Bah Manbha Kyndoh u la buh ka jingkyntu bad kyrpad sha ki paidbah ka Elaka Narpuh bad ka thain hi baroh kawei ba kin ai ia ka jingkyrshan kaba pura ban iasnoh kti lang bad katei ka sienjam iakhih kaba la lamkhmat da ka JAC khnang ba ka sorkar kan pyndep kloi iala ka kamram ban maramot mardor ia kane ka surokbah kaba la jot rathai mynta la bun snem.
