Shillong, Nailar 19: Ka Dorbar Shnong Mawryngkneng hynne ka sngi kala phah tuklar haka Myntri ka tnat ka koit ka khiah ka Kong Ampareen Lyngdoh ban pynbit pynbiang iaki jingdonkam hapoh ka jaka sumar ka Mawryngkneng CHC.
Haka dorkhas bala aiti shaka Myntri ka tnat ka koit ka khiah ka Kong Ampareen Lyngdoh, ka Dorbar Shnong Mawryngkneng kala pynpaw baka Mawryngkneng CHC ka donkam shibun ki jingdonkam ban pynbit pynbiang iaki lad ban ai jingsumar iaki paidbah.
Ka Dorbar Shnong kala pynpaw ba kumba ka long mynta ka Mawryngkneng CHC ka duna bha ki jingdonkam bad kane kala wanrah ka jingeh iaka jaka sumar ban ai ka jingshakri iaki paidbah kiba wan phah sumar.
“Haduh mynta ki don tang 2 ngut ki Medical Officers hapoh ka CHC bad uwei naki u don hapdeng ka shuti (Leave) bad ka don tang 8 ngut ki Nurse bad kane kala wanrah ka jingdkoh ka rukom treikam ka CHC kaba ioh pdiang kumba 150-200 ngut ki nongwan shim dawa kan ka sngi” la pynpaw ka Dorbar Shnong Mawryngkneng.
Ka Dorbar Shnong kala pynpaw ruh ba haduh mynta ka Mawryngkneng CHC kam don satia ka jaka iaid kiba duna dkhot met (Ramp) kaba buh jingeh iaki ban wan phah sumar.
Nalor kane ka Dorbar Shnong kala dawa ruh naka Myntri ban shim ki sienjam ban pyniar (Extend) iaka Mawryngkneng CHC bad ban pynkha iaka Trauma Centre, ka CBC (Complete Blood Count) bad ka TFT (Thyroid Function Test) hapoh katei ka jaka sumar.
“Ka CHC ka donkam Electric Backup land ka Generator ban pynbiang bording haka por ba duh bording bad ka donkam ruh daka kali kit nongpang (Ambulance) thymmai bad ka jaka ban pyllang lane buh iaki jait dawai bad injection” kala ong.
Haba iadei bad ka jingduna nongtrei hapoh ka CHC, ka Dorbar Shnong kala dawa naka Myntri ka tnat ka koit ka khiah ban thung nongtrei Grade IV, Ward Boy/Ward Girl bad Mali lane Gardener/Cleaning Staff.
