Shillong, Jymmang 21: Ka BJP jong ka jylla Meghalaya mynta ka sngi ka la dawa na ka sorkar jylla ban pyntreikam noh ïa ka Meghalaya Residents Safety and Security Act (MRSSA), hadien ba ka sorkar pdeng ka la pynbna ban pyrkhing tyngeh ia ka rung ka mih jong ki briew na Bangladesh bad Myanmar ban rung shapoh u pud ka ri India.
Ha ka kyrwoh ba la phah da u General Secretary ka BJP ka jylla, Bah Wankitbok Pohshna u la ong, “Ka MRSSA, kaba long kawei na ki ain ban iada pyrshah ïa ka jingwan rung be-aiñ jong ki mynder ri, kaba dang sahteng bad ka bym pat lah ban urlong satia, kumta na ka liang ka BJP ka dawa ba dei ban pyntreikam noh ïa ka MRSSA khnang ba ki paidbah nongshong shnong kin ym shah tyllep ha ki jingwan rung be-aiñ na kiwei pat ki ri,” u la ong.
U la pynpaw ruh, ba ka BJP ka dap da ka jingsngewhun ba ka sorkar jylla ka la sdang ban shimkhia ban tehlakam ia ka jingrung be-aiñ jong ki mynder ri, wat la ka BJP Meghalaya ka sngew ba kum kane ka sienjam ka la dei pyntreikam la kham slem ym ban da ap ia ka hukum na ka sorkar Pdeng.
“Ka sorkar jylla ka la shimkhia ban thaw da ka kynhun treikam (task force) ha man la ki district kaba dei ban pyntrei kam kum ka jingpeit pyrman ia ki briew kiba rung ba mih ha ki shnong ki thaw kiba rung tuh khlem ka jingioh bor ne khlem kino kino ki kot ki sla ba biang, hynrei mynta la bun snem kine ki kynhun kim shem la lah ban treikam bha ban ithuh ia ka jingnang roi jong ki khar Bangladesh bad ki Rohingya ha Meghalaya katkum ka jingpynshisha jong bun ki trai muluk,” u la ong.
“Ka BJP Meghalaya ka ai jingmut ba ka sorkar jylla kan pynkhlaiñ ïa ka kynhun treikam bad pyniar ïa ka ban kynthup ïa ki rangbah shnong bad ki dorbar jong man la ki dong ki lah ban ïarap ha kaba pynithuh ïa ki briew ki bym dei ki trai muluk bad ban pyntip marmar sha ki bor ka ain ban leh pat ia kaba donkam bad ka jingtohkit”, ong ka kyrwoh na u Pohshna.
U General Secretary ka BJP u la ong ba ka seng ka pynpaw ruh ka jingsngewnguh ïa ka Ministry of Home Affairs jong ka Sorkar Pdeng ba la ïalam da u Myntri Kam Poh Ka Ri, u Amit Shah, namar ka jingbuh por 30 sngi ïa baroh ki jylla ban pynithuh, pynshisha, bad pynbeit noh ïa kiba rung be-aiñ na Bangladesh bad Myanmar.
Katkum ki jingong jong u, ka jingwan rung be-aiñ khlem da pyntrei kam, ba la ïarap da ki ‘touts’ bad ki seng saiñ hima sima kiba don jingthmu vote bank, ka la ïaid la slem palat, kaba la pynkylla ïa ka jingdon ki briew ha bun bynta jong ka ri, kynthup ïa ka Meghalaya.
Ha kawei pat ka liang, u Pohshna u la pyntip ba ka BJP ka jylla ka dang pynkhreh ban phah da ka kynhun jong ki nongmihkhmat ban ïamir jingmut bad ki ophisar ka Tnad Kam Poh Ka Ri. Ka jingthmu ka long ban pynithuh ïa ki ophisar shaphang ka jinglong jingman kaba shisha ha ka nongbah shaphang ka jingwan rung be-aiñ, u la bynrap.
