Shillong, Nailur 04: Ka All Khasi Meghalaya Tourist Taxi Association (AKMTTA) hynnin ka sngi kala pynbnasyndon ban iakhih daka ba sangeh kit iaki nongshangkai pyrthei (Tourist) naduh 16 tarik Nailur 2025.
Kane ka jingiakhih kan long ba ki kali tourist jong ka Jylla kin sangeh ban kamai sha kylleng ki jaka jngohkai pyrthei (Tourist Spot) kiba don hapoh ka Jylla.
Kane ka jingsangeh kamai kan sdang naduh 16 tarik Nailur bad kan iai bteng tad haduh baka Sorkar Jylla kan khot iakren iaka Association.
Ia kane ka rai la shim haka jingialang jong ka Association haka jingdon lang baroh ki trai bad nongniah kali kamai tourist jong ka Jylla.
Haba kren shaki lad pathai khubor u President ka AKMTTA u Bah Recaldinus Dohling ula iathuh ba watla ka Association kala rai ban sangeh kamai hynrei ki kali pat kiba kamai na Shillong sha Guwahati kin iaid bteng ban kamai, namar kane ka jingiakhih ka dei ban sangeh kamai ban kit ia ki nongjngohkai pyrthei kiba dei tang ha ki jaka jngohkai pyrtei kiba don ha ka jylla
U Bah Recaldinus ula iathuh ruh ba ia kane ka rai la shim namar ka sngi baka Association kala air por iaka Sorkar hadien ka jingshong kyllainmungor ha Khyndailad ban khot iakren kala kut noh bad ruh ka sorkar kam shym la patiaw ia ka jingangnud ka Association.
“Ka jingiakhih kan dei beit tang ban sangeh kamai shaki jaka shangkai pyrthei (Tourist Spot) tad haduh baka Sorkar Jylla kan khot iakren ia ngi” la ong u Bah Recaldinus
