Nongpoh, Naitung 28: Haba bteng ban pynlong ia ki jingialang paidbah ban ialap ha kane ka Ilekshon MP Shiteng Samoi, ka National People’s Party (NPP), hynnin ka sngi, ka la pynlong ia ka jingialang ialap Ilekshon janmiet ha Umdihar bad ha katei ka jingialang, la iohi ba ki paidbah na ki shnong bapher bapher kiba hap ha Umsning Constituency, ki la wan ban sngap ia katei ka jingialang ialap Ilekshon ka NPP na bynta u Dr. DRL Nonglait, uba dei u Kyrtong ka NPP.
Ha katei ka jingialang, la sakhi da ka jingdon u Ma Sniawbhalang Dhar, Symbud Myntri Rangbah ka sorkar jylla, Dr. Celestine Lyngdoh, MLA Umsning, u bah Charles Marngar, MLA Mawhati, ka Kong Rona Khymdeit, MDC Nongpoh, kiwei ki nongialam ka NPP lem bad da ki hajar ngut ki nongkyrshan.
Lyngba katei ka jingialang paidbah, ki nongai jingkren na ka NPP, ki la kyrpad ia ki paidbah ba kin ai ka jingkyrshan kaba pura ia ka NPP bad ban pynjop don burom ia u Dr. DRL Nonglait, ha kane ka Ilekshon MP Shiteng Samoi na Shillong Parliamentary Seat.
Ki la ong ruh, ba u Dr. DRL Nonglait, u dei u briew uba la biang pura ba un mihkhmat ia ka jylla sha Nongbah Delhi, namar ba u dei u briew uba la stad bad shemphang bad ba ka jylla ka donkam ia u ba un iakren halor shibun ki mat na bynta ka Jaidbynriew.
Katba na ka liang u Dr. DRL Nonglait, haba ai jingkren u la kyrpad ia ki paidbah ba kin kyrshan bad ban pynjop ia u, ha kaba u la ong ruh, ba lada ki paidbah kin pynjop ia u, un sa iakhun bad iakren sha Nongbah Delhi, na bynta ban pynrung ia ka Ktien Khasi ha ka Khyrnit ba phra bad ruh ia ka ILP.
Sa peit ruh
