Shillong, Nohprah 17: U Myntri rangbah ka jylla, u Conrad K. Sangma mynta ka sngi kum u kongsan, u la plie paidbah ia ka Police Station ka tnad ba peit ia ka Anti-Narcotics Task Force (ANTF), ba la pynlong ha Meghalaya Police Radio Organisation Training School, Golf Links Shillong bad la sakhi lang ruh da ak jindon lang u symbut myntri rangbah ka jylla, u Bah Prestone Tynsong bad ruh ka Myntri ka tnad ka koit ka khiah ka Dr. Ampareen Lyngdoh.
Haba kren ha kane ka sngi kum u kongsan, u Myntri rangbah ka jyla, u la ong ba ka sorkar jylla ka don hapeng ka jingialeh thma pyrshah ia u drok, namar ka jingkynrei u drok la hap ban shim khia bad ruh ba ka la buh jingma ia ka lawei ki khun samla hapoh ka jylla.
U la ong ruh ba ka sorkar jylla ka la sngewkhia bha halor ka jingkynrei u drok bad ka la ia trei borbah ruh ryngkat kiwei kiwei ki tnad sorkar ha kaba ia khun pyrshah ia u drok.
“ Ki tnad treikam bapher bapher ka sorkar ki la iakhun ryngkat ban ia ialeh pyrshah na ka jingkynrei u drok bad khamtam ban wad ki lad ki lynti ban pynduhjaid lyngba ki jingiatrei lang bad kiwei ki lad ki lynti ban iada na ka jingktah u drok ia ki khun samla” ong u Myntri rangbah, u Conrad K. Sangma.
U la ong ruh kane ka Police Station jong ka ANTF kan treikam thikna kum ka jaka pdeng ban buddien ia ki ka khaïi drok bad ban ia trei lang da ki bor pulit ba kynthup ba kynthup naduh u Superintendent of Police (ANTF), Addl. Superintendent of Police/Dy. Superintendent of Police, Inspector (s), Sub-Inspectors, HC/WPHC/UBC/ABC/WPUBC/WPABC lem bad kiwei ki tnad sorkar.
Shuh shuh, u la buh ruh ka jingkyrpad ia ki shnong ki thaw bad ka imlang ka sahlang ba kin ia snoh kti lang bad ka sorkar, ha kaba ia dei bad ka jingialeh thma pyrshah ia u drok bad ruh ban don lem ka jingkitkhlieh khnang ba kane ka thma pyrshah drok ka sorkar kan long kaba jop bad ban lah ban rad dyngkhong ia ka jingkynrei u drok uba la ktah ia shibun ki khun samla ba lui lui jong ka jylla, u la bynrap.
