Nongpoh, Nohprah 19: Ka Nongpoh Region Auto Owners and Drivers Association (NRAODA) mynta ka sngi ka la ioh ban plie paidbah noh ia ka ophis treikam ba pura, kaba don ha phyllaw ka ophis DTO ha Nongpoh, ha kaba la wan ban plie paidbah da u Bah Mayral Born Syiem, MLA ka Nongpoh kum u kongsan.
Ha kane ka jingplie paidbah ia katei ka ophis treikam la don ryngkat ruh u MVI ka Nongpoh u Bah John Nongrang, u Bah Plielad Tiewsoh, Adviser, u Bah Bannasar Lyngdoh, President ka Association bad kynthup naduh ki nongialam bad ki dkhot na ki Unit bapher bapher.
Ha kane ka jingplie ia ka ophis treikam la pynlong ruh ia ka jingot cake kum shi bynta ban rakhe ia ka jingpdiang ia ka Christmas bad ruh ia u snem ba thymmai bad ruh ka jinglehkmen ba kane ka Association ka la ioh la ka jong ka ophis treikam ba pura ban pyniaid ne saindur ia ki kam kiba long na ka bynta ka bha ka miat jong ki trai Auto Rickshaw bad ruh ki dribar.
Haba kren ha kane ka sngi, u Bah Mayral Born Syiem, u la ai ka jingiaroh kaa khraw ia ki nongialam bad ki dkhot kane ka Association, kiba la lah ban buh noh da ka ophis treikam ba pura bad ka jingdon kane ka ophis kan iarap ia ki, ba kin lah ban saindur na ka bynta ka bha ka miat jong ki para dribar, kina ai ka jingshakri ia ki paidbah hapoh ka thain Nongpoh.
U la buh ruh ka jingkyntu kynpham, ba lyngba kane ka ophis treikam, ki nongialam kin lah ban leh shibun ki kam kiba ai jingmyntoi ia ki para dribar bad ruh ia ki paidbah nongleit nongwan ba kum ki dribar ki ai ka jingshakri ia ki piadbah ha ka leit ka wan.
Kaba kham kongsan kaba u la kham ban khia, ba ki dei ban long kita ki dribar kiba don ka jingkitkhlieh ia ki paidbah bad khatam ka jingshngain ki nongleit nognwan, lada kane ka Association kan pyntreikam ia ki buit treikam kiba kham bha bad kham paka ia ki paidbah.
Shuh shuh, u la kular ruh ba un dang ai ka jingiatrei lang bad kane ka Association bad kyrpad ruh ban ia trei da ka mynsiem jong ka jingieit bad ka jingbha, khnang ba kane ka jingdon ka Association kan long shisha ka jingmyntoi ia ki bad kumjuh ruh ia ki paidbah Nongleit nongwan, u la bynrap.
