Nongpoh, Lber 11: Ban khring ia kiba bun ki khun samla ba kin phai khmat sha ki kam ialehkai sport bad ban lait na shibun ki jingsniew kiba ktah ia ki khun samla ha kane ka juk ba la kynrei bha u drok, u Bah Badhok Nongmalieh kum uwei u riew rangbah u la plie da kawei ka jingialehka sport ba la tip kum ka Rumen Futsal Groun ha Mawdiangum.
Ia kane ka Rumen Futsal Ground la wan ban plie da u MLA ka Nongpoh u Bah Mayral Born Syiem kum u kongsan bad ruh da ka jingdon ryngkat u Bah Badhok Nongmalieh, uba dei u trai katei ka Futsal, u Bah Rekson Wajri, Rangbah Shnong ka Mawdiangum, ki riew rangbah bad kiwei ki nongialam shnong.
Ha kane ka jingplie ia kane ka Rumen Futsal Ground la ialehkai pyrlok ruh hapdeng ka KSU Nongpoh Circle pyrshah ia ka RBYF Nongpoh Circle.
Na ka liang u Bah Badhok Nongmalih, u la pynpaw ba ka jingplie kane ka Futsal kam dei tang ba ka ing ka sem kan ioh ia ka lad kamai, hynrei ka long ruh shi bynta ban ailad ia kiba bun ki khun samla kin pyleit jingmut ha ki kam ialehkai sport bad ba kin lait na shibun ki jingsniew khamtam ka jingkynrei u drok kaba la buh jingma ia ka lawei ki khun samla.
U la ong ruh ha kine ki sngi, ka jingma kaba kham ktah bha ka dei ka jingkynrei u drok bad lada don kum kine ki jaka ialehkai sport kan iarap ruh shibun ia ki khun samla ba kin pynleit jingmut ha ka kam ialehkai sport bad kan long ruh ka lynti ba kin klet noh ia ki jingdih ba sniew kiba ktah ym tang ia ki shimet bad ka ktah ruh ia ka ing ka sem bad ka imlang ka sahlang.
Na ka liang u MLA ka Nongpoh, u Bah Mayral Born Syiem u la ai khublei kyrpang ia u Bah Badhok Nongmalieh bad ka ing ka sem, ba ki la don kum kane ka jingthmu ban buh ia kane ka Futsal bad kane ka long shisha kawei na ka jaka ban saindur ia ki khun samla ba kin lait na shibun ki jingdih ba sniew khamtam ka jingma kaba la ap ia ki khun samla na ka jingkynrei u drok.
Shuh shuh, u la ong ruh ba kum u MLA ne u nongmihkhmat paidbah un dang ai ka jingiatrei lang bad ruh ban dang ia thaw ki lad ki lynti na ka bynta ban pynbiang ia ki jingdonkam ki khun samla ha ki kam ialehkai sport, namar lada ki samla ki im sngi ha ki kam ialehkai sport kan long shisha ka jingiarap ba kin lait na kiba bun ki jingpynshoi ne ki kam sniew kiba pynsniewdur ia ka jingim jongki, ia ka ing ka sem bad ka imlang ka sahlang, u la bynrap.
