Shillong, Nohprah 06: U Myntri rangbah ka jylla u Conrad K Sangma mynta ka sngi u la pynlait paidbah ia kawei ka kot ba la tip kum ka ‘A Sociological Study of The Khasi Religion’, ha kaba la don ryngkat u Chief Executive Member ka Khasi Hills Autonomous District Council (KHADC) u Bah Pyniaid Sing Syiem ha ryngkat ka jingdon lang kiwei kiwei.
Ia kane ka kot la thoh da ka Dr. Sharalyne Khyriemmujat, bad la pynmih paidbah pat da ka Cambridge Scholars Publishing House.
Kane ka kot la wan rah da u Syiem ka Hima Khyriem ka dei ka kot kaba wad bniah shaphang ka jingngeit jong ki niam Khasi (traditional Khasi belief).
Haba pynlait paidbah ia kane ka kot, u Myntri Rangbah ka jylla, u Conrad K. Sangma u la ai khublei kyrpang ia ka Dr. Sharalyne Khyriemmujat, kaba la thoh bad pynlait paidbah ia kane ka kot.
Ka Dr. Sharalyne ka la pynpaw ruh ia ka mynsiem jong ka jingsngewnguh ia u Myntri rangbah ka jylla, uba la ai ia ka por kaba kordor ban pynlait paidbah ia kane ka kot bad ruh ai khublei ia u CEM ka KHADC kiba la ai ka jingkyrshan haduh ba la lah ban pynlait paidbah ia kane ka kot.
Kum ban pynpaw, ka Dr. Sharalyne Khyriemmujat, ka dei ka assistant professor bad Head jong ka Department of Sociology, Shillong College. Ka la pyndep ruh ia ka PhD jongka na North-Eastern Hill University, halor ka phang “A Sociological Study of Ka Niam Khasi”.
